– Meir fleksibelt museum
Ingebrigt Vik museum opna den nye hovuddøra og viste seg fram i ny drakt. Og snart vert sjølve døra ny òg.
Det 88 år gamle museet i Øystese har no ei ny basisutstilling med ei anna utforming enn før, er nymåla, har fått nytt golv og ikkje minst ny hovudinngang med universell utforming.
Betre plass mellom dei utstilte verka er det òg, slik at sjølv ein rullestolbrukar kjem seg fram utan sterk otte for å gjera det heilt store. Alt i alt eit mykje meir fleksibelt museum enn tidlegare, konstaterer styreleiar Harald Kjosås.
Berre døra som opnar seg nær sagt av seg sjølv, manglar, men denne kan vera på plass til hausten. Rådmannen har nemleg tilrådd å løyva 100.000 kroner til tiltaket i 1. tertialrapport, som dei folkevalde i Kvam vedtek tysdag. Summen skal halda, fortel Kjosås, som fortel at døra vert tilsvarande inngangsdøra til Kunsthuset Kabuso.
Laurdag var det tid for feiring og framvising av det renoverte museet. Etter at formalitetane var tilbakelagde og snora klipt, strøymde dei frammøtte frå regnvêret ute til den knusktørre utstillinga inne. Berre vellæte var å høyra der folk spankulerte frå skulptur til skulptur.
Mykje på dugnad
Prikken over i-en er kanskje den nye rampen, kledd med kommunalt sponsa skifer og bygd på dugnad av ein gjeng med Lars Froestad i spissen og murar Bjørn Huse som fagmann. Utespesialisten har stilt opp med utstyr.
Inngangen, som ligg på baksida av museet og vend mot modermuseet Kabuso, vil no verta den einaste som vert nytta, fortel Kjosås, som sjølv har vore med på dugnadsarbeidet. Tidlegare starta omvisingar i museet gjerne ved den gamle inngangen på framsida, med trafikksus frå fylkesvegen som eit mildt sagt forstyrrande element. No er omgjevnadene monaleg rolegare.
Arbeidet med det «nye» museet, som eigentleg er det gamle sidan det ser ut om lag slik det gjorde under opninga 17. mai 1934, starta i februar. Framdrifta har med andre ord vore formidabel, konstaterte dagleg leiar Sissel Lillebostad i Kabuso.
Ho retta ei stor takk til mental og praktisk støtte til styret og ikkje minst styreleiaren. Etter hennar syn er det utført handverk av høgaste klasse. I retur fekk ho takk frå Kjosås. Mellom anna skaffa ho 300.000 kroner frå Norsk kulturråd si Arena-ordning.
– Ho er ei dame med bein i nasen og veit kva ho vil, slo Kjosås fast.
– Må oppsøkja fleire
Stian Jean Opedal Davies, leiar for utval for kultur, idrett og integrering i Vestland fylkeskommune, fekk æra av å klippa snora. Han meiner Hardanger og Voss museum, som det åttekanta bygget i Øystese soknar til, gjer ein formidabel jobb med å fremja norsk kunst, kultur og historie i si fulle breidd.
Han meiner det er eit felles ansvar å gjera kulturen tilgjengeleg for fleire grupper i samfunnet.
– Han fortener å verta formidla til alle som vil, og kanskje dei som ikkje visste at dei ville, sa Davies, som gav tilhøyrarane ei kort innføring i historia om Ingebrigt Vik (1867–1927).
Etter markeringa spela pianist Frode Skag Storheim musikk komponert av Edvard Grieg – med komponisten som forsteina tilhøyrar! Deretter vart det servert festkake i Kabuso og halde omvising i museet.
