Medlemsrekord for mållaget
I romjula passerte Noregs Mållag 15.431 medlemmer, det høgaste talet sidan 1985.
Allereie i august passerte Mållaget rekordtala frå i fjor med 14.104 betalande medlemmer, og i oktober runda organisasjonen 15.000 medlemmer, skriv dei i ei pressemelding.
— Det er veldig stas at så mange vil vere med, jublar leiar i Noregs Mållag, Synnøve Marie Sætre.
Dei siste åra har det vore jamn medlemsvekt, men i årets stortingsvalkamp gjorde medlemstalet eit kraftig byks.
— Vi fekk om lag 1.500 nye medlemmer etter FpU sin «F*** nynorsk»-kampanje i skulevalkampen, fortel Sætre.
— Den positive auka gir Mållaget ekstra giv i arbeidet for nynorsken. Det er viktig når vi skal arbeide for nødvendige gjennomslag for nynorsk i opplæringslova det komande året, seier ho.
I Kvam Mållag har talet på medlemer auka frå 105 i 2020 til 146 i 2021, opplyser informasjons- og organisasjonskonsulent Hege Lothe til HF.
