– Me var redde for å ikkje overleva
Mannskoret Laudamus står opp frå koronadvalen og inviterer til konsert.
– Me har starta opp og slutta, starta og slutta. Me har prøvd å ha øving på video, utan at det vart nokon stor suksess, fortel styreleiar Åsmund Kristiansen i mannskoret Laudamus.
Han og dirigent Eirin Beate Åserud-Løvlid, utstyrte med ein målestokk, plasserer Post-it-lappar på golvet i Norheimsund kyrkje før øvinga startar. Det skal vera to meter avstand til personen framfor og halvannan meter til sidemannen.
Endeleg kan koret samlast til ordentlege øvingar igjen, og torsdag inviterer koret til sommarkonsert i kyrkja. Med gjeldande restriksjonar vert det plass til om lag 100 i publikum.
– No er me her og skal ha konsert. Det hadde me ikkje trudd for ein månad sidan. Me har vore litt engstelege for at koret ikkje skulle overleva. Det er nokre kor som har gått til grunne, seier Åserud-Løvlid.
– Har fått det til
Koret har hatt sju øvingar i vår, men dei fleste gongane har bassar og tenorar hatt kvar sine øvingar. Torsdag hadde koret den tredje fellesøvinga si i vår.
Mykje av repertoaret er godt kjent frå før, men koristane har dessutan lært seg ein ny song. Ein prestasjon i seg sjølv, meiner Åserud-Løvlid.
– Me har utfordra oss sjølve i vår. Det er ikkje så mange kor som er i gang igjen. Men fire av kora mine skal ha konsertar i tida som kjem, seier ho.
På programmet står mellom anna nasjonalromantikk, sommarsongar og spirituals.
– Me treng nok ikkje å stå og seia unnskyld for at me syng dårleg. Det som vert presentert, er bra. Me har fått det til, trass i pandemien. Det i seg sjølv er grunn til å feira, seier dirigenten.
Må lita på seg sjølve
Ein av fordelane med å synga i kor er at røysta di glir inn i mengda. Du kan kvila deg litt på sidemannen. Ikkje alle er komfortable med å stå i si eiga boble og synga, med større avstand til dei andre, fortel Åserud-Løvlid.
– Ein må stola meir på seg sjølv. Men songarane som stiller opp og gjer det, vert flinkare, seier ho.
Også frykta for koronaviruset har halde nokre heime i vår, men etter kvart som fleire vert vaksinerte, er det fleire som torer.
– No håpar eg at dei siste kan komma og føla seg trygge, seier ho.
Åserud-Løvlid vonar at også publikum vil kjenna seg trygg nok til å komma.
– Me håpar på ein kombinasjon av at dei har lyst til å komma på konsert, og at dei har lyst til å støtta koret og gi oss litt mot tilbake, seier ho.
Koret har sett opp eit program for resten av året. Der står mellom anna ein julekonsert som vart utsett i fjor. Dessutan skal ei rekke kor samarbeida om konsertar i ulike kyrkjer i regionen. Eit samarbeid med Kvam Mållag er òg på plakaten, fortel Kristiansen.
Hadde konsert
Åserud-Løvlid dirigerer også Øystese Barnekor, som hadde konsert i Øystese kyrkje saman med Bjarte Leithaug laurdag. Om lag sytti personar var til stades for å høyra koret.
Sjå biletserie frå konserten her:
Også barnekoret har vore prega av opning og stenging, og det har vore noko fråfall, fortel Åserud-Løvlid.
– Me håpar det løyser seg til hausten, seier ho.
