– Me ser tydeleg eit behov for utbetring
Arbeidet med sherpatrapper og oppgradering av sti til Samlen lyt utsetjast til våren 2023.
Det fortel Reidun Haugen Dalseth. Ho er leiar i gruppa som har ansvaret for prosjektet, kalla Hardangertrappa, som HF omtala i februar. Det går ut på å forbetra turstien opp til det populære turmålet i Herand.
Målet var å få gjennomført fyrste byggjetrinn i 2022. No har prosjektgruppa innsett at planane lyt utsetjast til neste år, forklarar Dalseth.
Reglar og respons
Ifylgje henne er årsakene til utsetjinga at departementet har skjerpa inn reglane for bygging og renovering av stiar, særskilt sherpatrapper, og at gruppa har fått dårleg med og sein respons på søknader om pengestøtte.
I søknaden frå prosjektgruppa til fylkeskommunen i vinter vart det påpeika at stien opp til Samlen er farleg slik han er i dag, med lause steinar og trerøter som er lette å snubla i eller gli på. I fyrste byggjetrinn var planen å sikra starten på stien, som går gjennom ei svært bratt og rasfarleg ur med mykje lausstein. No lyt truleg byggjetrinnet utvidast, fortel Dalseth.
Ho forklarar at prosjektgruppa ynskjer tiltak også i myrområda. Ifylgje Dalseth har det dårlege vêret ført til at det har vore færre turgåarar i området i sommar, men at dei som har gått der, har etterlate seg tydelege spor.
– Stien har vorte mykje breiare enkelte stader. Me ser tydeleg at det er behov for utbetringar, seier ho.
– Ting tek tid
Prosjektgruppa har fått pengar frå mellom anna Sparebankstiftinga Hardanger og eldsjelfondet til Sparebanken Vest. Desse løyvingane har gruppa fått utsett, slik at dei kan nyttast dersom ho kjem i gang med utbygginga til våren.
Planen er å jobba vidare med søknader om pengar og å søkja om byggjeløyve, ifylgje Dalseth.
– Me ser at ting tek tid, og me nærmar oss budsjettet for fyrste byggjetrinn. Men me er motiverte for å jobba vidare med prosjektet. Me har god dialog med Geirr Vetti, som driv Stibyggjaren AS og skal ha det faglege ansvaret. Han har sagt at me skal verta prioriterte når me er klare, seier Dalseth.
Parkering ei eiga sak
Gruppa vil gjera noko også med parkeringsløysinga ved stien. Der finst i dag knapt plassar der stien byrjar. Resultatet er at mange parkerer langs vegen. Dalseth fortel at det ein dag vart talt 17 bilar langs fylkesveg 550.
Prosjektgruppa håpar å få etablert ein skikkeleg parkeringsplass i nærleiken, men tiltaket, som har vore drøfta med kommunen og fylkeskommunen, må fyrst finansierast. Parkeringsprosjektet og sjølve stiopprustinga må ein arbeida parallelt med fram mot neste sommar, seier Dalseth.
