– Me brenn etter å koma i gang att
To år på rad har festivalen Hardingtonar vorte planlagd og avlyst. I år kan festivalen endeleg feira at den vert arrangert for 30. gong.
Førre utgåve av Hardingtonar var i 2019. Arrangørane har likevel ikkje lege på latsida, fortel arrangementskoordinator Arngunn Timenes Bell. I 2020 og i 2021 hadde ein brukt mykje tid på å laga gode program, for så å oppleva at arrangementet måtte avlysast på grunn av koronaviruset. Arbeidet har likevel ikkje vore heilt bortkasta.
– Du kan kanskje seia at me har fått med oss mykje av det beste av det me hadde planlagt i 2020 og 2021. Me er veldig stolte av det programmet me har fått til i år, seier Bell.
Både Bell og styreleiar i Hardingtonar, Geir Botnen, er spente på korleis publikum vil reagera etter lang tid med koronarestriksjonar.
– Eg føler at det er eit sug etter å koma seg ut i bygdene. Mange ser ut til å ha venta på Hardingtonar, seier Botnen.
Mannsterkt orkester
Hardingtonar startar i Kabuso torsdag 9. juni når pianist Torgeir Kinne Solsvik og songaren Njål Sparbo serverer tekstar tonesette av Geirr Tveitt og Edvard Grieg. Fredag skal dei to ha konsertar på Toloheimen og Mikkjelsflaten.
Fredag kveld er det klart for den tradisjonelle opningskonserten i idrettshallen i Norheimsund. I år har konserten fått tittelen Jubileumstonar, sidan festivalen vert arrangert for 30. gong. Bergen Filharmoniske Orkester kjem denne gongen med utvida mannskap. Heile 110 musikarar skal fylla salen. Ifølgje Botnen er dette for å kunna framføra Vårofferet av Igor Stravinskij med tilstrekkeleg fynd og klem.
I tillegg til Vårofferet skal opningskonserten innehalda musikk av den danske komponisten Carl Nielsen – og sjølvsagt av Geirr Tveitt. Sjefdirigent Edward Gardner styrer orkesteret.
Kake og korps
Laurdag kan publikum ta med seg strikketøyet til Norheimsund idrettshall for å oppleva konserten Maske for maske og tone for tone med TrondheimSolistene og strikkedesignarane Arne og Carlos. Dei som ønskjer musikk og søtsaker kan ta turen til hotellhagen i Norheimsund, der det vert servert musikk frå tre korps og kake. Kaka er henta fram både fordi Norheimsund musikklag takkar av dirigent Patrik Randefalk, samstundes som Hardingtonar feirar at festivalen vert gjennomført for 30. gong.
Festkonserten laurdag kveld i Norheimsund idrettshall står Silje Nergaard med band og Trondheimsolistene for. Etter festkonserten er det duka for seinkveldskonsert med Sigrid Moldestad i Øystese kyrkje.
Sundag vert det familiekonsert i idrettshallen med den lokale duoen Naboen min. Hardingtonar vert avslutta sundag kvelden med ein konsert i Norheimsund kyrkje. Der framfører Ragnhild Hemsing og Trondheimsolistene musikk frå Peer Gynt av Edvard Grieg. Musikken er spesialarrangert for hardingfele og strykeensemble.
