– Me avsluttar alltid med ein tur innom Norheimsund
Sidan 2005 har Bengt Erik Gunnarsson og Anne Turi Øyan frå Stavanger årleg teke turen til Hardanger og Norheimsund. – Trebåtfestivalen har vore sakna, seier Gunnarsson.
I Lady Bowmore, ein Furuholmen trebåt frå 1965, nyt Gunnarsson ei brødskive med peanøttsmør og ein kopp kaffi laurdag føremiddag. Paret frå Stavanger har lagt til kai i båthamna i Norheimsund for å få med seg årets trebåtfestival. Dei fortel båe at festivalen har vore etterlengta dei siste to åra. Men koronapausen har ikkje sett ein stoppar for turane deira.
– Me var her seinast i fjor, til akkurat same tid, seier Gunnarsson.
– Ekstremt velkomne
For stavangerparet er Hardanger fast destinasjon når dei legg ut på båttur om sommaren. Medan dei varierer kvar dei er innom undervegs på turen, har dei ein fast stoppestad før dei vender skuta heimover att.
– Me avsluttar alltid med ein tur innom Norheimsund, fortel Gunnarsson.
Etter at båten vart kjøpt i 2005, har paret jamleg teke del i båtfestivalen i bygda. Dei er fulle av lovord om staden og innbyggjarane.
– Me føler oss ekstremt velkomne her. Folka som steller i stand festivalen, er heilt eventyrlege, og dei tilreisande er veldig kjekke, seier Øyan.
Skotsk whisky
57 år gamle Lady Bowmore, som er ein plattgatter, er kalla opp etter den skotske whiskyen med same namn. Paret fortel at dei elskar både Skottland og den brune drykken. Såleis var det det ei enkel sak å finna namn til båten.
Ifylgje Gunnarsson er det berre skroget på båten som er att etter han vart bygd. Resten er oppgradert og endra på. Gunnarsson er utdanna møbelsnikkar, og han står bak fleire av detaljane og gjenstandane, alle laga i tre, som ein kan skimta inne i båten.
I tillegg til å trivast på sjøen trivst dei godt i fjellet. I Hardanger får dei nyta båe delar. Ifylgje Gunnarsson tek paret seg dagleg ein topptur så langt det lèt seg gjera når dei er i området.
– Det er så utruleg vakkert her. Ein vert rett og slett glad av å vera her, seier Øyan.
