– Mange fine stemmer
Torsdag 5. desember hadde Norheimsund og Øystese ungdomskor konsert i Norheimsund kyrkje. Koret framførte blant anna den nye songen «Desembernatt».
Koret er for ungdomar frå 8. klasse og oppover. Medlemene opptrer på ulike arrangement i løpet av året, inkludert konsertar og gudstenester. Koret bidreg også til lokalsamfunnet med musikalske innslag på den årlege lysmessa og julekonsertar.
Koret hadde fleire musikarar med seg: Vidar Sangolt på piano og som dirigent, Elise Brunner på fiolin, Hannah Bryn på cello, Gustav Sangolt på perkusjon, Vegard Sangolt på trommer, Alvin Vestrheim på bass og Bjørnar Sangolt på gitar.
– Det er verdt det
Dirigent Vidar Sangolt seier at konserten var veldig fin. Han skildrar øvingsperioden som veldig travel. Til trass for eit hektisk tidsskjema har koret jobba hardt for å få alle songane innøvd på kort tid.
– Det er mykje som skal øvast på, men det er verdt det når resultatet vert så bra, seier dirigenten.
For mange av dei unge koristane handlar ikkje koret berre om musikk, men også om å vera ein del av eit godt miljø og å vera eit førebilete for dei yngre generasjonane. Ruth Natalie Kimo Berre og Melinda Isabella Cao Zheng synest det er veldig gøy å vera med i koret.
– Eg som går på vidaregåande, føler at eg er eit førebilete for dei litt yngre som går på ungdomsskulen, seier Berre.
Ho innrømmer at det kan vera travelt å få tid til både skule og korøvingar.
Berre hadde ein solo på konserten som ho gledde seg til – «Kviskre i bønn». Ho fortel at ho både gledde seg og grugledde seg litt på same tid, men at ho var veldig nøgd i etterkant.
– Utruleg flinke
Blant publikummarane var Christina Båstad, som hadde kome for å oppleva konserten og kjenna på julestemninga.
– Eg ville kjenna på julestemning, og eg kjenner fleire i koret, så det var gøy å vera her, seier ho.
Båstad roser ungdomane for innsatsen og synest konserten var veldig bra.
– Dei var utruleg flinke, og det var mange fine songstemmer, seier ho.
Markus Lønning Hystad, ein annan som var til stades på konserten, likte at det var noko for alle generasjonar.
– Det er ein fin måte å samla unge og eldre i jula på. Alle fekk oppleva noko saman, og det var ei veldig hyggeleg stemning, seier han.
Journalistane er mediefagelevar på Framnes Kristne Vidaregåande Skule. HF gjer merksam på at den eine fotografen sjølv er med i ungdomskoret. Red.
