Madelene er allereie i julestemning

Frå Madelene var lita, har ein av juletradisjonane vore å sjå juleframsyninga i Bergen. Snart skal 16-åringen sjølv gå på scena i Grieghallen for å underhalda born og vaksne som vil koma i julestemning.

– Det er kjekt å vera med. Eg vart sjokkert då eg vart vald ut, for det hadde eg ikkje venta, seier ho.

Det heile starta då ho såg veninna Bertine Irgam frå Bergen spela stykket i fjor. Bertine sa at Madelene burde prøva seg på audition. I sommar troppa veninnene opp på scena i Grieghallen saman med rundt åtti andre for å prøva seg i rollene, fortel Madelen. Ho seier at alle fyrst måtte syngja ein del av songen «Vil du være med så heng på». 12 born stod på scena samtidig. Alle presenterte seg sjølve, og song saman to og to.

– Etter det sa dei som vurderte oss: «Du er med og du er med, resten kan reisa heim. Takk for at de kom.» Så det var litt brutalt, seier Madelene.

– Viktig å ha energi

Dei som kom vidare frå songauditionen, måtte så læra seg ein av dansane. Madelene fortel at skodespelarane som hadde vore med på framsyninga året før, lærte dei dansetrinna. Ho måtte terpa på å få trinna til å sitja, samstundes som ho skulle syngja. I den neste runden framførte deltakarane dansen og songen om og om igjen. Så fekk nokre beskjed om å gå fram, og desse var vidare.

– Me vart vurderte på om me klarte å synga fint og høgt. I dansinga var det viktig å ha energi, smila og by på seg sjølv. Ein kunne ikkje vera keisam. Det var òg viktig å få til trinna, seier ho.

12 er med i gruppa til Madelene. Dei spelar same rolle, og må byta kostyme fleire gonger i vekslingane mellom å vera nissekone og reinsdyr. Alle i gruppa er med på dansane, og så har enkelte av dei eigne oppgåver i nokre scener. Madelene har éin replikk under den eine dansen. Det er for det meste hovudkarakterane som snakkar, seier ho.

– Er blitt hekta

Øvingane tok til i september. I fem–seks helger og enkelte andre dagar har Madelene teke bussen til Bergen for å øva saman med dei andre. Øktene varar i mellom tre og fem timar.

– Det var utfordrande i starten, då me skulle læra alle dansane og songane. Alle skal gjera alle trinna på likt, og det er ikkje enkelt. Eg har lært masse, seier ho.

Heldigvis kan ho overnatta hjå Bertine, som bur i Bergen, i øvingshelgene. Dei vart kjende då Madelene budde i Bergen. Madelene flytta til Norheimsund då ho gjekk i 2. klasse. Det er veldig kjekt å gjera dette stykket saman, seier Madelene.

Under øvingane har ho fått mange nye vener. Dei fleste som spelar i stykket, kjem frå Bergen og Askøy. Dette året er det fleire nye skodespelarar enn det plar vera, ifylgje Madelene.

– Eg har fått julestemning allereie. No kan eg alt, og er blitt hekta på songane.

– Nervepirrande

29. november er det premiere på framsyninga i Bergen. Dagen før får ho møta dei omreisande skodespelarane, som har hovudrollene i alle framsyningane i landet. Den fyrste gongen ho får sjå korleis stykket vert, med rekvisittar og kostyme, er under generalprøven på premieredagen. Til no har ho hatt øvingar i Grieghallen, men ikkje på scena.

– Eg gler meg til å sjå korleis alt blir. Det vert spanande, seier Madelene.

I publikummet kjem det til å sitja familie og vener. Madelene trur det kjem til å vera kjentfolk på alle dei åtte framsyningane.

– Det vert litt ekstra nervepirrande, men eg trur det skal gå fint. Eg synest det er kjekt at dei gidd å ta turen for å sjå på, seier ho.

– Det er stort

Å stå på scena er ikkje nytt for songaren frå Kvam. Ho har sunge saman med bestefaren sin, Geir Botnen, både i kyrkja på julaftan og på julebord på hotell. Han spelar piano og ho syng. Tidlegare har ho gått i kor, og då ho var lita, gjekk ho på dans. Desse ferdigheitene tek ho med seg inn i stykket.

Likevel er det litt ekstra spenning knytt til at framsyninga skal vera i Bergen.

– Grieghallen er ei stor scene. Det er stort at eg skal spela stykket der. «Putti» er ein juletradisjon for mange, seier ho.

Då Madelene var yngre, hadde ho lyst til å satsa på song og musikk, men no har ho bestemt seg for at det er noko ho kan gjera i tillegg til eit anna yrke. Kva yrke ho skal ha, har ho ikkje bestemt seg for endå. No går ho på studiespesialiserande i Øystese, og har bestemt seg for å studera vidare. Men ho har allereie bestemt seg for at ho stiller til «Putti Plutti Pott»-audition neste år òg.

– Ja, absolutt. Det har vore ein draum sidan eg var lita, så det er stas å vera med, seier ho.