Lèt naturen uttrykkja seg
Janicke Schønning lagar kunst saman med naturen. I sommar kan publikum oppleva nokre av arbeida hennar i Kunsthuset Kabuso.
Schønning har eit utandørs atelier i Nordmarka utanfor Oslo. I meir enn ti år har ho utforska korleis naturen påverkar tusj og vassfarge på papir og lerret, skriv Kabuso i omtalen av sommarutstillinga «Eg var her».
Sjølv om Schønning brukar utradisjonelle metodar, er ho ein del av ein lang friluftsmåleri-tradisjon. Friluftsmålaren står ute i friluft med fysisk nærleik til motivet. Det nye med kunsten til Schønning er at ho lèt vêret vera medskapar i kunstverket. Når ein arbeider under open himmel, vert både kunstnaren og kunstverka påverka av naturkreftene.
Schønning prøver å finna ut korleis naturen uttrykkjer seg gjennom å setja spor. Når teikningane og måleria vert til i dialog med elementa, har kunstnaren sjølv berre delvis kontroll. Sniglar har vandra over arka, regnvatn har påverka tusjstrekane, blad har visna over teikningane og sopp har sett avtrykk på lerreta.
I arbeidet med sommarutstillinga har Schønning vitja Hardanger fleire gonger. Overgangen frå den tette granskogen i Nordmarka til fjell og fjord i Hardanger har påverka verka i utstillinga.
Utstillinga opnar laurdag 1. juli og skal stå til 17. september.
