Løyver truleg pengar til Fosse-feiring

Fylkesdirektøren meiner det viktig og rett at Vestland fylkeskommune deltek økonomisk for å markera den kulturelle storhendinga, og føreslår å løyva 250.000 kroner. Fylkesutvalet drøftar saka 9. november.

Fylkesordførar Jon Askeland (Sp) svara førre veke på eit spørsmål frå Hege Lothe (SV) om kva Vestland fylkeskommune vil gjera for å markera at Fosse får prisen 10. desember. Askeland er svært glad for at Fosse får prisen. Han ser det som naturleg at Vestland fylkeskommune bidreg i markeringa.

Dette er fyrst og fremst ein pris til forfattaren sjølv, men Fosse har sagt at han ser på tildelinga som ein pris til nynorsken, skriv fylkesordføraren. Dermed er dette ei utmerking som gjeld mange aktørar i den nynorske språkfellesskapen: bokbransjen, skulane og utdanningsinstitusjonane, bibliotek, teater og litteraturhus.

I samarbeid mellom aktørane er det teke initiativ til markeringa i Bergen. Det Vestnorske Teateret er sentralt i dette, og det er mange samarbeidspartnarar. Avtalar, rettar og opplegg er ikkje sluttførte. Fylkesdirektøren vil fylgja opp saka, skriv Askeland.

Fosse har budd i Bergen i ei årrekkje, og har spela ei stor rolle for kultur- og litteraturlivet i Vestland. Han har mellom anna utdanning i litteraturvitskap frå Universitetet i Bergen, og har vore student og lærar ved Skrivekunstakademiet, som er ei viktig satsing for Vestland fylkeskommune, opplyser Askeland.

Fosse har spela ei viktig rolle i utviklinga av moderne nynorsk litteratur og nynorsk som scenespråk, og vore aktiv i utviklinga av mellom anna Hordaland Teater og Det Vestnorske Teateret. Verka til Fosse er stadig aktuelle, og det er truleg at det kan koma søknader om særlege satsingar. Dette vil ein ta stilling til som del av relevante tilskotsordningar, skriv fylkesordføraren.