Løyvde pengar til to kulturminne
Eit kulturminne i Norheimsund og eit i Strandebarm har fått pengar frå Vestland fylkeskommune.
To kulturminne i Kvam fekk til saman 110.000 kroner då hovudutval for kultur, idrett og inkludering løyvde til saman 1,64 millionar kroner til verna kulturminne. Dette skjedde i møtet onsdag 13. mars, ifølgje vlfk.no.
Det vart løyvt 40.000 kroner til restaurering av skifertaket på eit hus på Tinghaug i Norheimsund. Huset, som er i sveitserstil, er frå 1914.
Det vart også løyvt 70.000 kroner til restaurering av taket på eit våningshus på Omaholmen i Strandebarm. Taket er i dag dekt med H-heller. Pengane skal brukast til å byta desse ut med eit tradisjonelt rasteskifertak. Dei eldste delane av huset vart truleg bygde tidleg på 1800-talet.
Kvam herad fekk avslag på seks andre søknader. Til saman hadde kommunane i Vestland søkt om 11 millionar kroner til vern av kulturminne.
