Lokal utsmykking på plass

Bebuarane kan med andre ord nyta lokal kunst, og ikkje lenger berre nymåla vegger, frå sofakrokane.

På opninga av utstillinga til den lokale kunstnaren i haust nemnde fleire at Kvam herad burde kjøpa kunst til Strandebarm omsorg og smi medan jarnet var varmt, fortel Ljones. Haldis Flotve i Strandebarm Kvinne- og Familielag gjorde noko med det.

Fekk nesten full pott

Flotve tykte òg at Strandebarm omsorg trong utsmykking, og meinte kunsten burde vera lokal. Utstillinga var eit flott høve for alle til å verta kjende med verka til Ljones, tenkte ho.

Så kontakta ho kvinne- og familielaga på Innstranda og Mundheim, Olav Tombre i Lions Club Strandebarm og Annlaug Vik i det lokale pensjonistlaget. Alle var einige i å gå saman om å få kunsten til Ljones hengd opp i nybygget. Saman hadde dei i alle fall råd til noko, tenkte Flotve.

Saman skreiv organisasjonane brev til Kvam herad om kva dei meinte om kunstnaren og om at heimen måtte pyntast. Etter kort tid kom svaret.

Organisasjonane søkte om 336.000 kroner, som var den totale kostnaden på seks verk dei hadde sett seg ut. Kvam herad bladde opp nesten heile summen – 300.000 kroner.

Det er fantastisk, synest Flotve. Pengane som manglar, skal dei finna ei løysing for, seier ho.

– Gjev tilbake

Det er eit flott initiativ, synest Ljones. Det sjuande og største kunstverket har ho donert til heimen. Kunstverket var i 2014 utstilt i Kunsthuset Kabuso, og heiter «Skogblome».

– Sidan kommunen er så raus, så får eg gje litt tilbake, seier Ljones.

Idet HF er på veg ut, kjem Olav Tombre og Jens Tveit gåande. To store verk er hengde opp. No skal karane henta eit juletre som skal stå utanfor. Det er travelt å vera pensjonist, konkluderer dei.

– Kva med dei fire bileta i stovene? Lyt me prøva oss sjølve? spør Ljones.

– Ja, me treng ikkje mannfolk til alt, svarar Flotve.