Lokal og rustikk luksus på Folgefonna
Restauranten i det nye velkomstbygget på Folgefonna opna i helga og har vore travelt vitja sidan. — Å koma opp til fonna, er som å koma inn i ei ny verd. No skal enda fleire få oppleva det, seier Michael Iversen, leiar i Visitfonna AS.
Sjølv utan annonsering av opninga har veka vore travel på den nye restauranten. Dei om lag 400 daglege gjestane i bakken har bidrege til at dei om lag 170 sitjeplassane har vorte fylte opp. Den fyrste veka har vore ei innkøyringsveke, fortel Iversen.
Restauranten er ein del av det nye velkomstbygget, som skal stå heilt klart i løpet av hausten. Bygget skal verta eit fleirbruksbygg med mellom anna restaurant, skiutleige, konferanserom, taktribune og lokale for breførarlaget.
— Det er ikkje mykje som hindrar folk i å koma hit no. Det vert enklare for alle å reisa hit når det er gode fasilitetar rundt breen, seier Iversen.
Bre og fjord
Bygget skal også bidra til at fleire får oppleva breen utan ski på beina. Dei store vindauga frå restauranten og utsikta frå taktribuna gjev vidsyn mot både bre og fjord.
— Ein av hovudopplevingane ein får på Folgefonna, er jo naturen. I mine auge er det ikkje noko finare å sjå på enn snø, og her kan ein sitja og sjå på den så lenge ein vil. Alle som er i bakken, får sjå både snøen og fjorden. Når tribunen på taket vert ferdig, kan ein få den utsikta også derfrå. Fonna er kjend for fonn og fjord. No vert det tilgjengeleg for alle.
Restauranten skal verta eit nytt samlingspunkt og gje eit godt tilbod til dei som står på ski og dei som berre tek turen opp for å sjå, fortel Iversen. Kombinasjonen av mat og natur kan trekkja fleire enn dei med ski på beina, trur han.
Lokalt på fatet
Kokken, Joachim Jensen, fortel at det lokale har vore ein nøkkel i utviklinga av menyen. Om ein stiller seg på toppen av taktribunen, kan ein sjå til mange av stadane maten kjem frå, fortel han.
— Mange i området er stolte av Folgefonna og gler seg over den. Ho representerer jo Hardanger, på eit vis. Me ynskjer å knyta oss mest mogleg til folk. Me gler oss over produsentane som finst i nærleiken og alle dei fantastiske produkta som vert laga, både på grunn av det gode klimaet og eldsjelene i kvar krik og krok, seier Jensen.
Så mykje som mogleg skal difor vera lokalprodusert. Det betyr ikkje at rettane vert tradisjonsrike.
— Kjøttkaker og raspeballar hadde vorte for tung mat for dei som skal opp på fonna. Italiensk mat fungerer veldig godt som lunsjrettar. Det er lett, behageleg og godt. Difor har me valt ein meny som er inspirert av det italienske kjøkkenet, men med eigne, norske vriar og råvarer.
– Heilt rått
Ein finn ingen frityrkokar på kjøkkenet i velkomstbygget, og heller ingen typisk fast food.
— Folgefonna er luksus. Å kunna stå på ski på ein isbre og å eta i slike omgjevnadar, er rett og slett luksus. Men det er rustikk luksus. Det ynskte eg å ta med inn i menyen. Gjestane skal kjenna at maten er heimelaga og litt luksus, men ikkje få inntrykk av at eg har nytta pinsett og linjal for å laga den. Det skal vera laga frå botnen og ordentleg godt, rett og slett. Eg ynskjer jo berre å gleda menneske ved å servera dei mat dei kjem til å lika.
Kjøkkenet er prega av at folk er stolte av og glade i staden og maten dei lagar, ifølgje Jensen.
— Det er ein så god energi her. Eg kjenner meg heldig som får jobba på ein slik stad og i eit slikt miljø. Det er jo heilt rått og utruleg kult å få laga god mat på ein slik stad.
