Lokal filmmakar kjem heimom
Frode Storaas frå Ålvik vitjar filmklubben når hans eigen film vert synt tysdag 14. april.
Saman med nepalske Dipesh Kharel har Storaas regien på den sosialantropologiske dokumentarfilmen «An Indian Love Story». Kjærleik og kastesystemet er nøkkelord.
Filmen handlar om Kuldeep som er forelska, men problemet er at kjærasten kjem frå ein høgare kaste. Far hennar vil vurdera å godta ekteskapet om Kuldeep får seg fast jobb i staten. Hjelp søkjer han hjå gudinna Kali.
Filmklubben har ifylgje leiar Nick Christensen tradisjon for at anten ein i styret eller ein ekstern innleiar fortel om filmane som skal visast, slik at publikumet får litt bakgrunnskunnskap, men det er sjeldan at ein lokal filmmakar står på scena. Filmen vart vist også på Bergen Internasjonale Film Festival (BIFF) i fjor.
Storaas er professor og visuell antropolog ved Universitetsmuseet ved Universitetet i Bergen. Han og Kharel vart kjende med Kuldeep under innspelinga av deira førre dokumentar, «A Kali Temple Inside Out», ifylgje BIFF.
Filmklubben har stort sett 60–70 betalande medlemer, og det er vanleg at 35–40 kjem på filmane i Ungdomshallen. Klubben får høyra at det er imponerande tal med tanke på innbyggjartalet i Kvam, fortel Christensen.
– Me får høyra at me viser mange gode filmar, og at folk set av tysdagskvelden til oss, seier Christensen, som trur at låge prisar og kakekos før filmane kan ha god magneteffekt.
