Lisa (13) fekk hovudrolle

Lisa har drive med både song, dans og drama på kulturskulen i Norheimsund. Ho har opptredd ved mange ulike høve, og trivst godt på scena.

– Det er stas å visa fram noko ein har jobba med, seier 13-åringen.

Ho likar å reisa til Bergen for å sjå på teater saman med mor hennar og nokre vener. I haust kjøpte dei billettar til oppvisninga «Marerittet» av Musikaljentene. Lisa hadde aldri høyrt om gruppa før, men vart skikkeleg imponert.

– Musikalen var heilt fantastisk! Eg ville vera med, for det såg så kjekt ut, fortel Lisa.

Kom på audition

Ein dag fekk ho tips om at Musikaljentene skulle ha open audition til deira neste oppsetjing. Lisa melde seg på, og møtte på audition i januar.

– Eg hadde aldri gjort det før, så eg var veldig spent, seier ho.

Auditionen gjekk over to dagar. Fyrst skulle deltakarane syngja eit utdrag frå ein song dei hadde førebudd. Dei kunne velja mellom bestemte songar frå oppvisningane til Musikaljentene. Deretter var det dansing som stod på programmet. Borna skulle visa fram ein koreografi der det var viktig med god energi og utstråling. Til slutt skulle deltakarane prøva seg på skodespel.

– Det var veldig kjekt! seier Lisa.

Over 200 born møtte opp på audition. Berre 30 roller skulle fyllast, og mange av dei gjekk til folk som har vore med i musikalgruppa før. Lisa fekk tildelt eine hovudrolla, Olivia.

– Eg vart kjempeglad då eg kom med, fortel 13-åringen.

Lisa deler rolla si med Ella Langøen. Jentene skal spela på tre førestillingar kvar. Lisa opptrer 17., 23., og 25. august.

Kjekk historie

Karakteren Olivia er ei 11 år gammal jente. Ho bur i ei grå, streng gate der ein så vidt har lov til å smila. Olivia er eigentleg ein glad og leiken person, men ho kan ikkje visa det. Lisa fortel at ein gut som heiter Sebastian flyttar inn i gata. Dei to vert bestevenner.

– Men eg kan ikkje avsløra kva som skjer vidare. Det får ein sjå på førestillinga, seier Lisa.

Ho tykkjer historia er artig og kjekk å spela. Ifølgje henne går det heilt fint å pugga manus. 13-åringen likar å koma på øvingar når ho kan det ho skal.

Sjå video frå øvinga her:

Nye vener

Lisa kjente ingen i musikalgruppa frå før, men det gjorde ingenting. Det er ein fin moglegheit til å få fleire vener, seier ho. Gjengen har brukt mykje tid saman, og vorte godt kjende. Lisa tykkjer det er sosialt og koseleg å vera i «musikalbobla».

Dei andre borna er frå Bergen og området rundt, medan Lisa pendlar frå Norheimsund. I sommarferien har ho budd hjå vener og familie i Bergen for å sleppa den lange reisevegen kvar dag.

– Dei gongane eg må køyra fram og tilbake, er det verdt turen, seier Lisa.

13-åringen har fått meirsmak på musikal, og skal vera med i ei ny oppsetjing til jul. Ho gler seg til å stå på scena framfor publikum.

– Det vert kjekt å opptre saman med resten av gjengen, seier Lisa.

Gjorde inntrykk

Mathilde Strønen Damm har ansvar for regi og manus i «Gaten vår». Ho hugsar godt Lisa frå audition.

– Lisa skilde seg ut. Ho var naturleg, ærleg og trygg på scena, seier Damm.

Ho fortel at Lisa stod støtt på føtene og strålte av rein glede. Damm tykkjer Musikaljentene har eit unikt miljø der borna får moglegheit til å uttrykkja seg.

– Dette er ein trygg arena for å utvikla og finna seg sjølv, seier Damm.

Ho fortel at «Gaten vår» handlar om viktigheita av kreativitet og å ta born på alvor. Sist gong dei spela musikalen var under korona, for eit avgrensa publikum. Damm er glad for å vera tilbake til normalen.

Søstersatsing

Gruppa Musikaljentene vart starta i 2012 av søstrene Cecilia, Mathilde og Selma Strønen Damm og Lovise Espeland. Jentene var mellom 10 og 12 år gamle. Det heile byrja med at familien Damm var på hyttetur. Søstrene krangla, bråka og laga spetakkel. Til slutt sa mor deira at dei fekk gå ut og finna på noko kreativt.

– Me kom tilbake med ein idé om å laga musikal, fortel Mathilde Strønen Damm.

Dei sette i gang med å skriva musikal og oppsøkte scenekunstnarar og folk som kunne hjelpa. Ifølgje Damm gjorde jentene mykje sjølv, men dei fekk tett oppfølging frå vaksne.

– Dei tok oss på alvor, seier Damm.

12 år seinare lagar systrene framleis musikalar. Alle tre er nyutdanna. Cecilia og Selma har studert musikal i Sverige, medan Mathilde har studert regi i England.

– No er me tilbake og har lyst til å satsa, fortel Damm.

I 2023 stakk Musikaljentene av med sigeren i Norske Talenter. Systrene tek seg av både koreografi, manus og musikk. Til no har dei skrive fire musikalar. Damm tykkjer det er stas å laga noko sjølv.

– Det er kjekt å sjå at ideane tek form på scena, fortel ho.