Legg nye føringar for bruk av offentlege areal
Kva bør vera greitt og ikkje i samband med bruk av offentleg uterom?
Kunne du tenkja deg å nytta parken til å arrangera kunstutstilling eller servera mat? Eller har du ein draum om å laga til ein festival?
Kvam herad inviterer no innbyggjarar til å koma med innspel til nye retningsliner for bruken av offentleg uterom.
Offentleg uterom vil seia areal som er opne for ålmenta. Det kan vera parkar, torg, opne plassar, uteområde ved kommunale bygg, gater, strender, kaiar og friluftsområde, for å nemna noko.
Heradet håpar at retningsliner for bruken vil bidra til ei meir heilskapleg og strategisk forvalting av uterom for arrangement. Ein rettleiar vil gje større førehandsvisse for arrangørar og sikra at alle vert handsama likt, meiner administrasjonen.
I dei førebelse retningslinene er mellom anna speling av musikk omtala. Kvam herad meiner ein bør fylgja anbefalingane i rettleiaren til Helsedirektoratet, og skriv i utkastet at arrangørar kan verta pålagde å måla musikkstøy på arrangøren si rekning.
Siste frist for å koma med innspel er 15. februar. Sidan skal retningslinene handsamast politisk.
