Lars Einar spådde best
Lars Einar Torsnes var fyrst framsynt og hadde dinest ein dose flaks.
Karen frå Norheimsund, busett på Lofthus, vart vinnar i spåtevlinga til HF i 2023. Han presterte rett svar på 15 av dei 20 spørsmåla me stilte om kva som ville skje i fjoråret (sjå spørsmål og svar nedst i artikkelen).
Det same resultatet fekk to andre deltakarar, men etter loddtrekking vart Torsnes den heldige vinnaren av eit gåvekort på 1.000 kroner frå ein valfri, lokal butikk.
Artikkelen held fram under annonsen.
Torsnes fortel at han plar delta i ymse tevlingar, anten det gjeld kryssord eller kviss, i til dømes HF, Hardanger Folkeblad, Sogn Avis eller BT.
– Så sant eg har nokolunde vitige svar å koma med, seier han.
Merksame lesarar kan ha fått med seg at Torsnes så seint som fredag vart peika ut til vinnar av den siste utgåva av tevlinga på baksida til HF, der målet er å gissa kva, kven eller kva stad ein ser på eit bilete. Det var slett ikkje fyrste gongen.
– Og kviss er moro, men eg går ikkje fast kvar fredag eller noko slikt. Kvar haust er eg med på ein tur med Kiel-ferja der det er kviss med skyhøg prestisje, fortel han.
Torsnes bomma i spådomstevlinga mellom anna på spørsmålet om Jon Fosse ville få ein viss pris, noko han altså ikkje hadde tru på.
– Han skulle jo liksom aldri få prisen, seier Torsnes, som presiserer at han både unner og gratulerer prisvinnaren frå Strandebarm.
SPØRSMÅL OG SVAR
1. Får Torgeir Næss halda fram som ordførar i Kvam etter kommunevalet? Ja
2. Vert Rosenborg seriemeister i fotball for herrar? Nei
3. Klarar Furedalen Alpin å halda skitrekket ope minst til 15. april? Ja (16. april)
4. Vil dieselprisen verta minst 30 kroner per liter i Kvam? Nei
5. Skårar Torgeir Børven fleire enn ti mål for Vålerenga i serien? Nei
6. Kjem heradsstyret til å seia ja til å greia ut nasjonalpark i fjella i Kvam? Nei
7. Får Roald Aga Haug halda fram som ordførar i Ullensvang etter kommunevalet? Ja
8. Vinn ein kvemming prisen for årets sider i klassen for amatørar under Siderfestivalen i Øystese?Nei
9. Får Sp flest røyster i kommunevalet i Kvam? Nei
10. Hamnar det nye seniorfotballaget til Øystese og Norheimsund på øvste halvdel av tabellen i 4. divisjon? Nei (nedrykk med god margin)
11. Kjem ein skiskyttar frå Kvam til å koma på pallen i noregscupen? Ja
12. Vert Noreg mellom dei ti beste i Eurovision Song Contest? Ja
13. Kjem Hardangerakademiet til å arrangera leirskule? Ja
14. Får Jon Fosse Nobelprisen i litteratur? Ja
15. Vert Martin Ødegaard toppscorar for Arsenal i Premier League i sesongen 2022–2023? Ja
16. Bikkar den gjennomsnittlege månadsdøgertrafikken i Jondalstunnelen 1.600 køyretøy i juli? Ja (1.632)
17. Vert temperaturen på Kvamsøy minst 30 grader i juli? Nei (29,9 grader var maksimaltemperaturen
18. Kjem reguleringsplanen for svevebanen til Rossnos i Ullensvang til å verta godkjend? Nei
19. Får minst to nye serveringsstader eller uteplassar i Kvam fast skjenkjeløyve? Nei
20. Vert Liv Sollesnes mellom dei ti beste i baneskyting i klasse 3–5 på Landsskyttarstemnet på Voss? Nei
HF gjer merksam på at det fyrst vart opplyst i artikkelen at vinnaren bur i Odda. Det korrekte er Lofthus. Feilen vart retta 8. januar klokka 06.01. Red.
