Larmen er her

Det nærmar seg helg og det nærmar seg larm. Til helga brakar Bygdalarm laus. Allereie frå starten av denne veka har det vore folk til stades i parken i Norheimsund for å gjera klart til festivalen. Utan all den gode hjelpa hadde det vore umogleg å arrangera festival.

– Det er herleg å endeleg få arrangera festival igjen. Det er kjekt å laga til festival når ein får så mykje velvilje frå folk, spesielt frå næringslivet som stiller opp og hjelper til der det trengst, fortel frivilligsjef Sigbjørn Rykkje.

Mykje arbeid

Festivalsjef Ida Sørheim og Rykkje er mellom dei som står i bresjen for arrangementet. Før fredag må mange små og store detaljar vera på plass. Sørheim og Rykkje har mange med på laget.

– Eg er imponert over engasjementet rundt det å jobba som frivillig på Bygdalarm. Det er fantastisk å sjå at det kjem til liv, alt det som til no berre har vore på planen. Spesielt kjekt er det med 18- og 19-åringane som no er gamle nok til å vera med og melde seg som frivillige, seier Rykkje.

Det er ikkje til å legga skjul på at Bygdalarm har hatt ein litt seig start.

– Eg trur generelt at det har vore tregare å få i gang salet av billettar til kulturarrangement. Derimot ser me, spesielt den siste veka, at billettsalet aukar, påpeikar Sørheim.

Tilbake igjen og igjen

Mange av dei frivillige har vore med i fleire år. Rykkje har sjølv kjøpt festivalpass berre to gonger til Bygdalarm. Etter to år i militæret i 2008 og 2009 har han vore med kvart år, anten som frivillig eller i styret. Rykkje understrekar at han ikkje er åleine som gjengangar.

På parkeringsplassen rullar det inn ein traktor. I førarhuset sit Martin Aksnes, som snart har vore med som frivillig i ti år.

– Det er kjekt å få vera med på å skapa liv i bygda. I tillegg er det kjekt å treffa igjen gamle klassekameratar som har sett av helga til å vera på Bygdalarm, fortel Aksnes.

Den eldre garde

Mykje hardt arbeid ligg bak ein festival, og det er ikkje berre dei unge som bidreg. Jon Teigland har hovudansvaret for å setja opp hesjestaurar som skal avgrensa festivalområdet. I år er det det 15. året han er med på å reisa hesene på Bygdalarm.

– Det er berre kjekt å kunna hjelpa ungdomane som er så dyktige, flinke og ikkje minst uthaldande og arrangerer festivalen år etter år. Det gjer seg ikkje sjølv, så ungdomen skal ha mykje skryt for jobben dei gjer, seier han.

Pensjonistar hjelper Teigland med å hesja. Mange av dei er i 70- og 80-åra.

– Det er kjekt at det er så mange som kjem for å hjelpa til, og så er det sosialt. Premien er slike t-skjorter, seier Teigland

Tilbyr ribbtur

Festival vert det. Fleire kjende artistar, mellom andre Odd Nordstoga og Lars Vaular, kjem til Kvam. Men kva gjer eigentleg artistane på når dei ikkje spelar?

– Dei får moglegheita til å reisa ut i ribb. Så førebur dei seg jo til å opptre og har lydprøve. Vår oppgåve er å få dei til å trivast når dei er her, seier Sørheim.

– Mange av dei har avgrensa med tid, då fleire kjem same dagen som dei skal spela, men nokre nyt også andre artistar på plenen i ein time eller to, fortel Rykkje.