Langreist tingar: – Prøver å få med meg det meste
Henriette Kildahl Rudhag i Sverige tek vare på nynorsken ved å lesa HF.
Rudhaug kjem frå Norheimsund, men flytta til Sverige i 1988. Ho bur i Göteborg, er utdanna vegingeniør og arbeider med byplanlegging.
– Kor lenge har du abonnert på HF?
– Eg hugsar ikkje heilt når eg byrja, men det må vera minst 25 år sidan.
– Les du avisa på nett eller papir?
– Begge delar, men papiravisa er ei veke gamal når eg får den, så eg vurderer å gå over til eit reint digitalt abonnement.
– Kvifor abonnerer du på HF?
– Eg har familie i Norheimsund. Både foreldra mine og søstera mi bur i bygda. Røtene mine er i Norheimsund. Difor har eg lyst til å følgja med på kva som skjer. Avisa gjer at eg held nynorsken ved like.
– Kva les du?
– Eg blar gjennom avisa kronologisk, og prøver å få med meg det meste. Du kan vel seia at eg heller les kulturstoffet enn sportssidene. Kor grundig eg les, kjem an på kor god tid eg har.
– Kva likar du og kva likar du ikkje med avisa?
– Eg har ikkje tenkt gjennom kva eg likar og ikkje likar. Hadde eg budd i Kvam og vore meir involvert i det som skjer, hadde eg kanskje lese avisa med eit meir kritisk blikk.
