Langreist tingar: – Eg saknar Bygdalangs

Teigland frå Teigland ovanfor Øystese bur i Vadsø. Det har ho gjort sidan 2011. Ho arbeider som assisterande fylkeslege hos Statsforvalteren i Troms og Finnmark.

– Kor lenge har du abonnert på HF?

– Eg har sikkert abonnert i ti år. Eg fekk eit abonnent i gåve, og likte avisa så godt at eg bestemte eg for å halda fram å abonnera.

– Les du avisa på nett eller papir?

– Eg les papiravisa, sjølv om det går ei veke før den kjem til Vadsø. Det gjer liksom ikkje så mykje. Det som skjer i Kvam, vert sjeldan riksnyhende. Sjølv om avisene er gamle, er innhaldet nytt for meg.

Teigland er storesøster til Arne-Kristian Glück-Teigland og veslesøster til Ingunn Hildonen Teigland.

– Ei av årsakene til at eg abonnerer, er at eg må følgja med på kva slekta driv med. Bror min er støtt og stadig i HF. Avisa er min kanal til det rører seg der eg budde dei første 19 åra av livet.

– Kva les du?

– Eg får alltid med meg skråblikka på baksida. Elles skummar eg gjennom heile avisa, sjølv om eg ikkje les kvar einaste tekst.

– Kva likar du ved HF?

– Eg likar at Skåralappen ikkje har vorte altfor tabloid. Det er ikkje mange saker om kattar i lyktestolpar og liknande. De tek lokalpolitikken og dei lokale politikarane på alvor. Det står det respekt av.

– Kunne noko vorte betre?

– Eg er veldig glad i portrettintervju, og saknar magasinet Bygdalangs. Kvar gong det kom, måtte eg bryggja ei heil kanne med kaffi i staden for koppen eg treng til ei vanleg avis.