Langreist tingar: – Det vart så mykje tull med leveringa

Margreta Bjørke kjem frå Vikedal, og har budd på Island sidan 1986. Ho budde mange år i Reykjavik, før ho for eit par år sidan flytta til Akureyri. Ho og mannen har i ei årrekkje drive to butikkar som sel produkt frå Safa og Janusfabrikken. Det gjer dei framleis, men ho har trappa litt ned etter at ho nådde pensjonsalder.

– Kor lenge har du abonnert på HF?

– Det byrjar bli mange år. Eg abonnerte allereie før eg flytta til Island.

– Les du avisa på nett eller papir?

– No les eg berre avisa på nett. Det var veldig koseleg å ha papiravisa, men det vart så mykje tull med leveringa. Ulempa med å ha eit digitalt abonnement er at det er lettare å gløyma å lesa avisa. Det gjer ein ikkje når ein får avisa i postkassen.

– Kvifor abonnerer du på HF?

– Grunnen er at eg vil følgja med på kva som skjer i Kvam. Det er viktig, sidan eg framleis har hus i Vikedal og er der ofte.

– Kva les du?

– Eg les det meste. Det er ikkje så stor avis, så ein må jo lesa alt. Eg tykkjer det er ekstra kjekt å lesa om folk eg kjenner.

– Kva tykkjer du om HF?

– Eg tykkjer det er veldig viktig med lokalaviser. Kanskje er det ekstra viktig for oss som har flytta vekk?

– Kunne noko vorte betre?

– Kanskje de kunne skrive litt meir om korleis det går med kvemmingar som har flytta til utlandet? Det kunne vore interessant for mange.