Låner ut påskelektyre

Dei tre biblioteka i Kvam er stengde, men dei kan låna ut bøker og anna materiale på visse vilkår.

Opptil fem lån kan tingast per e-post. Lånaren må opplysa kva type bøker ho eller han har lyst på og kva bibliotek ein kan henta dei ved. Tinginga må vera komen til biblioteket same dag som utleveringa skal skje. Ved Norheimsund bibliotek kan ein henta bøker tysdag. Ved Ålvik bibliotek kan ein henta dei fredag 3. april.

Bøkene vert plukka frå hyllene, lånte ut og lagde i ein bibliotekpose merkt med førenamn utanfor biblioteket.

Mange vil låna

– Det vart svært mykje meir etterspurnad enn eg hadde trudd, seier biblioteksjef Ragna Helene Soldal.

Biblioteka fekk førespurnad sist veke om dei kunne gjera noko slikt, men då sa smittestyresmaktene nei. No har ein fått andre retningsliner. I samråd med kommunelegen har bibliotekaren funne ut at ho kan tilby avgrensa bibliotektilgang.

– Me hadde 19 posar liggjande utanfor i Grova torsdag. Me har fått mange tingingar i Ålvik. I Strandebarm vart det òg lånt ut bøker. Det er tydeleg at det er eit behov. Biblioteket i Strandebarm er eit kombinasjonsbibliotek med skuleutlån på dagtid og folkebibliotek om kvelden.

Bøkene kan gje folk få noko meiningsfylt å gjera i påsken.

Viktig med tidtrøyte

– Påsken er forbunden med krim, men eg trur mange likar å lesa annan litteratur òg. Det er ekstra godt med ei bok no når me ikkje kan samlast slik som til vanleg. Mange har måtta leggja vekk planar for påskeferie og samlingar. Då er det kanskje ekstra viktig med ei bok. Eg vil tru me har hatt kring 25 utlånsposar i Norheimsund og Strandebarm torsdag, seier bibliotekleiaren.

– Kva skal du lesa til påsken?

– Eg les heile tida. Eg held på med trilogien Byens spor av Lars Saabye Christensen. Og så har eg nett lese Hyttebok frå helvete av Are Kalvø. Den var morosam. Kva eg skal lesa i påsken, vil tida visa. Men lesing blir det, det kan eg lova deg. Eg les mykje og ser lite på tv. Då vert eg avbroten av at eg les ei bok.

Bøkene vert for tida lånte ut utan innleveringsfrist. Purringar kjem ikkje før biblioteket er i normal drift att.

– Tek omsyn til hygienen

Biblioteket forventar at lesarane har hyppig og god handhygiene med handvask eller bruk av desinfeksjonssprit før og etter leseøkta.

– Bibliotekarane tek sjølvsagt omsyn til smittevernreglane og har god handhygiene. Me brukar plasthanskar når me handterer bøkene. Alle bøker som vert leverte inn i koronaperioden, vert vaska og sette i «karantene» (altså blir ikkje lånte ut att i næraste framtid), skriv Soldal på Facebook.

Om nokon har problem med å henta ut bøker eller får nokon til å henta, kan ein likevel kontakta biblioteket med tinginga. Biblioteka samarbeider med Grannehjelpa.

– Ordninga føreset at me ikkje får ein situasjon der me ikkje kan bemanne tenesta, skriv Soldal.

Det er Fylkesbiblioteket i Vestland i samråd med FHI som har tilrådd biblioteka å gje eit lånetilbod til lesehungrige.