Lagar film om jubilant

Det var Bjarne Fonneland som fekk ideen om å laga film. Tanken var å basera plottet på pengeinnsamlinga for tre år sidan. Då lak taket på Lidarende, og det trongst mykje pengar til reparasjonen. Fonneland vart også inspirert av den gamle komediefilmen «The Blues Brothers» frå 1980.

– Per Røberg og Tom Tyssebotn er Vikøy sitt svar på Blues Brothers. Det var naturleg at desse to skulle spela hovudrollene, seier Fonneland.

Lang erfaring

Det er ikkje fyrste gong Røberg og Tyssebotn har drive med skodespel. Duoen har nemleg stått på scena saman i over 20 år. Nokre av deira beste minne kjem frå revyar på Lidarende. Det var også då gamling-karakterane, som dukkar opp i jubileumsfilmen, vart skapte.

– Me har nytta dei karakterane i alle slags samanhengar og tilstellingar, fortel Tyssebotn.

Ein gong sende duoen inn eit innslag til Norsk Revyfestival. Då bar det av garde til Høylandet for å visa fram sketsjen. I salen sat sjølvaste Tande-P, Alf Tande-Petersen, og to tusen publikummarar.

– Me vann ingen pris, men me hadde det veldig moro! seier Tyssebotn.

Røberg fortel at dei fekk hjelp av profesjonelle sminkørar for å sjå ut som gamle menn. Duoen hadde på seg sminka resten av kvelden. Tyssebotn enda på dansegolvet saman med ei jente som kommenterte at han såg gamal ut.

– Eg vart litt fornærma, for eg hadde gløymt at eg var sminka som ein 80-åring, fortel han.

Ifølgje Tyssebotn treng dei ikkje lenger sminke for å sjå ut som «gamle menn». Før nytta duoen potetmjøl for å få rett farge på håret. Heller ikkje det var naudsynt til jubileumsfilmen.

Artig duo

Tyssebotn og Røberg har vorte godt kjende. I byrjinga av revykarrieren hadde dei ofte med seg stikkord eller tema ut på scena, for å vita kva dei skulle snakka om. Planen hadde lett for å skli ut, då duoen likar å improvisera.

– Me fungerer godt saman. Eg har prøvd med andre, men eg får ikkje den same responsen. Me to er skrudde saman slik at det går bra, fortel Røberg.

Makkeren er einig, og fortel at dei slepp å pugga mykje manus.

– Me har ein heilt spesiell kjemi. Når Per seier noko, veit eg kva eg skal svara. Det kjem heilt naturleg, fortel Tyssebotn.

Duoen har laga nokre småfilmar før, men ikkje på dette nivået. No har dei fått med seg Magnus Hisdal, frå Hardangerfjord Media AS, til å regissera, filma og redigera. Skodespelarane vart overraska då dei fleste scener gjekk bra på fyrste forsøk. Røberg og Tyssebotn likar å få den andre til å le, og er heller ikkje immune mot eigne vitsar.

– Me lo så tårene trilla innimellom, seier Røberg.

– Filmen har mange løgne scener, og me brukte nesten ikkje manus, så me sa nye ting kvar gong, legg Tyssebotn til.

Bønder på bytur

Ei av scenene i filmen går føre seg i Bergen. Ho handlar om den gongen Lidarende-styret spurde fylkeskommunen om pengar til takreparasjon. Ein måtte sjølvsagt få med seg fylkesordføraren på filminnspelinga.

– Det skulle ikkje vera oppspinn, forklarer Tyssebotn.

Fylkesordførar Jon Askeland hadde ti minutt til rådvelde, og understreka at filmgjengen måtte vera presis. Ifølgje Tyssebotn var dei ute i god tid. Dei traska bort til rådhuset, banka på og kika inn. Då innsåg kvemmingane at dei var på feil stad. Dette var rådhuset i Bergen kommune — ikkje fylkeshuset.

– Me fór av garde med stokk og kostyme, humpa nedover gatene og kasta oss inn døra i siste liten, fortel Tyssebotn.

Duoen kom fram eitt minutt før tida. Ifølgje Røberg rakk dei akkurat å tørka sveitten før fylkesordføraren vinka dei inn.

Frå Høylandet til Hollywood

Karane trur jubileumsfilmen vert eit godt minne.

– Målet er at filmen dukkar opp på YouTube, Netflix, filmfestivalen i Cannes og i Hollywood, seier Røberg.

– Me kom oss til Høylandet, så me må klara Hollywood, legg Tyssebotn til.

Dei er einige om at Hisdal har gjort ein god jobb som regissør.

– Magnus laga ei samanhengande historie og fann ut kva scener me skulle ha, og så tok me utgangspunkt i det, seier Røberg.

Planlegginga starta i vinter, og rundt påske var det tid for innspeling.

– Dei er gode på åimprovisera og vera morosame på sparket, seier Hisdal.

Difor er det ikkje så mykje dialog i manuset. I filmen møter hovudpersonane ulike folk og utfordringar. Fleire lokale kjenningar har fått biroller. Kven dei er, skal ikkje avslørast før premieren på jubileumsfesten 26. oktober. Programmet vert også vist sundag 27. oktober.

Besøk av NRK

Hisdal er lærar i mediefaget på Framnes Kristne Vidaregåande Skule. Elevane hans fekk ansvaret for ei av scenene i filmen. Ho gjekk føre seg i Vikøy kyrkje og kravde 100 statistar. Dette var den fyrste scena som skulle filmast. NRK var på besøk på innspelingsdagen, i samband med skjermfrie dagar på Framnes.

– NRK filma at elevane skulle laga film. Dei kjende nok på litt ekstra press, fortel Hisdal.

Ifølgje Røberg vart det ein god dag.

– Elevane var gira og me var gira. Me kom inn i rollene med ein gong, seier han.

– Per var så entusiastisk at han gløymde at ryggen verka. Etterpå hadde han bruk for stokken, fortel Tyssebotn.

Framneselevane hadde ulike ansvarsområde: manus, regi, «green screen» og produksjon. Dei skulle bestemma alt sjølve – Hisdal var berre kameramann.

– Ein lærer mykje av å prøva sjølv og ikkje berre få undervisning i eit klasserom, seier Hisdal.

Glad i fiksjon

Han har ei bachelorgrad i film- og tv-produksjon. Som student arbeidde han mykje med fiksjonsfilm. I dag handlar dei fleste oppdraga om å dokumentera og formidla informasjon.

– Det er kjekt med oppdikta film. Då må ein tenkja meir på manus og skodespel, fortel Hisdal.

Han har ikkje vore aktiv på Lidarende sjølv, og visste lite om staden før filmprosjektet starta. Hisdal har gjennom samarbeidet vorte betre kjend med både miljøet og folka.

– Dette har vore ein veldig kjekk jobb! Skodespelarane er trivelege, og me var heldige med vêret under innspelinga, fortel Hisdal.

Filmen er støtta av lokale sponsorar.