Lagar film om Glück-Teigland
Hardangerfjord Media AS (HM) ved Magnus Hisdal i Norheimsund har søkt kraftfondet i Kvam herad om 70.000 kroner.
Pengane skal gå til postproduksjon av ein pilotepisode til ein dokumentarserie om Arne-Kristian og Kristin Glück-Teigland i Øystese. Redigeringa vil ta 90–100 timar og kosta kring 55.000 kroner, trur Hisdal.
Kjøp av ekstern hjelp til lydarbeid og kjøp av musikk vil kosta til saman 15.000 kroner.
Resultatet vil verta ein pilotepisode på 30 minutt, opplyser Hisdal i søknaden. Pilotepisoden skal brukast til å promotera prosjektet for større kringkastarar som NRK og TV 2.
Hisdal starta prosjektet for snart to år sidan, og har sidan då følgt paret med kamera. Han har gjeve dokumentarprosjektet arbeidstittelen «Kristin + AK = Hardanger Åtgaum». Dei skapar aktivitetar og opplevingar i lokalmiljøet og regionen, skriv Hisdal i søknaden. Paret har fokus på kultur, tradisjonar og berekraft. Dei er gode ambassadørar for eit pulserande Hardanger, skriv Hisdal.
Magnus Hisdal er utdanna lærar og har ein bachelor i film- og tv-produksjon frå Universitetet i Bergen. Han starta HM i 2015, og har sidan gjennomført større og mindre filmprosjekt i regionen. Han er i ferd med å avslutta ein dokumentarserie om livet på Framnes Kristne Vidaregåande Skule.
Hege Grane Hisdal er engasjert som intervjuar og med research i HM. Ho er medieutdanna frå Høgskolen i Bergen og Universitetet i Bergen, og har jobba 11 år i Visit Hardanger.
