Lærer å organisera sjau

På Bygdasjau vert det mellom anna konsert med Whammyboy, DJ, snacks, slush, lasershow og UV-såpebobler. Festivalen er gratis og går føre seg i idrettshallen på Norheimsund skule.

– Eg er veldig spent og håpar folk kjem, seier festivalsjef i Bygdalarm, Ida Sørheim.

Ho fortel at det har vore snakk om å laga eit slikt ungdomsopplegg tidlegare. Bygdalarm har aldersgrense 18 år, og målgruppa til Badnalarm er born og familiar.

– Ungdomane har òg lyst til å gå på konsert, fortel Sørheim.

Godt samarbeid

Tanken var at ungdomane sjølve kunne vera med å arrangera. Sørheim tok kontakt med Siriann Lillevik frå Grannehjelpa. Saman fekk dei ballen til å rulla. Resultatet vart ein «festivalskule» — eit samarbeidsprosjekt mellom Bygdalarm, Grannehjelpa, Ungdomsbasen og Fartøyvernsenteret.

– Festivalskulen starta opp i april, og rundt 10 ungdomar har vore innom. Dei har samlast på fartøyvernsenteret kvar torsdag for å læra om festival og planleggja Bygdasjau, seier Sørheim.

– Eg vonar tilbodet vekkjer ei interesse for musikk og organisering hjå ungdomane. Dei får vera med på å laga noko som er større enn seg sjølve, seier ho.

På festivalskulen har ungdomane lært om alle dei ulike aspekta av å arrangera ein festival. Mellom anna å samla sponsorar, tinga artistar og å promotera arrangementet.

– Me vaksne set nokre rammer, men målet er at ungdomane får forma arrangementet sjølve. Tankane og ideane deira er viktige, seier Sørheim.

Ho tykkjer festivalskulen er eit lærerikt tilbod som skapar engasjement hjå deltakarane. Sørheim vonar fleire unge får augo opp for den allsidige festivalbransjen. Ifølgje henne er planen å starta festivalskulen opp att til hausten.

– I år kom me seint i gang. Til hausten vil me få betre tid til å planleggja, seier Sørheim.

Sjokkert over kostnad

14 år gamle Alexander Nitter er ein av deltakarane på festivalskulen. Han fekk høyra om tilbodet gjennom ungdomsbasen, der han arbeider som frivillig.

– Det er kjekt å prøva noko nytt. Eg ville sjå korleis det er å arrangera festival, fortel Nitter.

Han tykkjer det har vore kjekt å planleggja Bygdasjau og læra korleis ting fungerer. Det overraska Nitter kor mykje det kostar å skaffa artistar.

– Eg vart sjokkert over kor dyrt det er å laga festival! seier han.

Ifølgje Nitter kan det vera ein krevjande bransje, og ein får det ikkje alltid slik ein vil. Deltakarane på festivalskulen tykte mellom anna det var vanskeleg å skaffa sponsorar, då ingen hadde høyrt om opplegget deira før. Likevel har gjengen klart å setja saman ein heilaftan full av artige innslag. Musikk, snacks, dans og lys. I tillegg kjem graffitiartisten Patimperfect. Han taggar ulike motiv på kleplagg som folk tek med seg. Nitter trur arrangementet vert suksess.

– Eg gler meg til konsert, seier han.

Deltakarane på festivalskulen skal vera med som frivillige på Bygdasjau. Dei hjelper til med både rigging, gjennomføring, rydding og evaluering.