Kvemming spelar hovudrolle i tv-satsing: – Litt som fyrste skuledag

Fleire tusen ungdomar kjempa om hovudrollene i ein ny dramaserie som skal sendast på NRK. Etter fleire rundar med videoopptak og audition enda Garen opp med ei av dei største rollene i tv-serien, som vert produsert av Mothership Entertainment AS for NRK.

Framover skal ho kombinera skodespel med jobben som lærling hjå Papiljotten frisør i Norheimsund. Travle dagar er ho vand med etter nyleg å ha teke ei intensivutdanning på fem månader på Norsk Frisørskole Bergen.

– Eg er fæl til å utsetja, men når eg fyrst hiv meg rundt, får eg ting gjort, fortel kvammajenta.

No står lærlingtida og sveineprøva att før ho er i mål. Garen er glad for at arbeidsgjevaren hennar vil leggja til rette for at ho skal få fylgja den vesle skodespelardraumen.

Mykje venting

Noka sceneerfaring har Garen skaffa seg opp gjennom åra. Den unge kvinna har vore med på fleire tilstellingar og framføringar i skulesamanheng. Ho skulle hatt ei av hovudrollene på vinterfesten til 10.-klassingane på Kvam ungdomsskule i fjor haust, som var avlyst på grunn av pandemien.

– Eg er absolutt ikkje noka stjerne på scena, men eg har alltid lika å snakka med folk og visa fram det eg har øvt på, seier Garen.

Det at ho enda opp med å søkja på rolla, var litt tilfeldig. Garen fortel at det var besteveninna, Jasmin Golis, som hadde fått med seg utlysinga på Facebook.

– Ho hadde sett at fagarbeidaren i klassen vår, Monika Johansen, hadde tagga meg i eit innlegg produksjonsselskapet la ut – noko eg ikkje hadde fått med meg. Det var ute etter ungdomar med vestlandsdialekt, så då søkte eg, fortel kvemmingen.

Presentasjonsvideo og bilete vart sende, og så vart det venting. Mykje venting. Då ho ikkje fekk svar, men visste at andre søkjarar hadde fått respons, søkte ho like godt ein gong til og fekk positivt svar få dagar seinare.

– Då vart det jubel i heimen! fortel Garen.

– Spanande karakter

Fleire prøvefilmingar og ny presentasjonsvideo vart send. I tredje runde var ho med på audition saman med eit utval av søkjarane. Dei prøvespela mot kvarandre, improviserte og las manus. Og så vart det ny runde med venting.

Til slutt kom telefonen med spørsmål om å vera med i ein pilotepisode. Han skulle sendast til NRK, som skulle vurdera om serien skulle produserast. Når han var godkjend, kom den endelege beskjeden til Garen om at ho fekk ei av hovudrollene.

– Det gjekk så langt tid før eg høyrde noko at eg ikkje trudde det var noko av, seier Garen.

I dramaserien skal ho ha rolla som Thea, klassen sin influensar og ei av dei populære. Men det var eigentleg ikkje planen, ifylgje Garen.

– Eigentleg skulle eg vera Sara, den meir modne og snille elevrådsrepresentanten. Men etter at eg fekk beskjed om å prøva ein runde som Thea, kjende eg at det fungerte betre for meg, fortel ho.

Kvammajenta kjenner seg meir att i skildringa av Thea og tykkjer det er ein spanande karakter. No gler ho seg til å koma i gang med innspelinga, som startar neste veke.

Vestlandet sentralt

Mesteparten av innspelinga vil finna stad på Glesvær i Øygarden. Serieskapar Christoffer Ebbesen har laga eit univers som skal nå ungdomane direkte og som er på deira premissar, opplyser Marie Fuglestein Lægreid, som er ein av produsentane.

Lægreid er tilsett i produksjonsselskapet Mothership Entertainment AS. Ifylgje henne skal serien bestå av 30 episodar som kvar varar i 10 minutt. Serien har eit budsjett på 17,6 millionar kroner.

Produksjonsselskapet er vestlandsbasert og jobbar med å byggja ein sterkare og større bransje på Vestlandet.

– I ein slik serie er det viktig at me reindyrkar talenta me har rundt oss både framfor og bak kamera, og ikkje minst at me får syna fram det fantastisk flotte miljøet som er her på Vestlandet, særskilt med fokus på kysten, fortel Lægreid.

Det aller viktigaste med serien er, ifylgje produsentane, at det vert laga ein serie som er på ungdomane sine premissar og som appellerer til deira interesser og veremåtar.

– Dette har vore eit enormt fokus frå starten av. Me har heile vegen hatt inne fokusgrupper og juniorredaktørar både for å gje oss den informasjonen me treng om livet deira, men også for å få eit godt blikk på innhaldet, dialogane, miljø og univers direkte frå kjelda som er målgruppa vår, opplyser Lægreid.

Kontroll på nervane

Då lokalavisa snakka med Garen onsdag ettermiddag, hadde ho akkurat kome heim frå samling i Bergen. Ho tykkjer det er mykje å setja seg inn i, men vonar at det ikkje vert noko problem å hugsa alle replikkane. Ho føler seg godt vareteken av «crewet» og trivst godt i gruppa. Men noko nervøs vedgår ho at ho er.

– Det er litt som fyrste skuledag. Du vil jo ikkje at dei skal tenkja at du er dårleg eller at du ikkje passar inn. I tillegg kan det verta ein kamp om rollene. Men det handlar berre om å gjera nervøsiteten til noko spanande og tenkja «eg kan ikkje dumma meg ut no, eg er i ei rolle», fortel Garen.

Ho trur at mange sjåarar vil kjenna seg att i handlinga i serien, som tek føre seg mellom anna det å verta mobba, å prøva å passa inn og å ha det bra med seg sjølv.

– I ei lita bygd får folk vita kva ein gjer omtrent før ein veit det sjølv. Ord spreier seg så fort. Kanskje dei som ser, tenkjer meir over korleis det dei seier og skriv, påverkar andre? seier Garen.