Kvemming dukkar opp på skjermen: – Tek val som vil sjokkera

Det seier Sisilja Skeistrand Garen (17) frå Øystese om ungdomsserien Rykter. Torsdag vert ho å sjå på skjermen i ei av hovudrollene i serien.

– Ein «bygdeserie»

Rykter tek føre seg korleis det er å vera ungdom på bygda på Vestlandet. Garen trur at mange unge vil kjenna seg att i handlinga.

– Fleire av dei positive og negative sidene vert tekne opp. Eg tykkjer at handlinga i serien er veldig realistisk, seier kvemmingen.

Bilar og byliv er bytte ut med båtar og naust. Ungdomane prøver å finna ut av kven dei er, samstundes som dei skal passa inn i gjengen. Det at handlinga er lagd til bygda og ikkje til storbyen, vonar Garen vil fengja sjåarane.

– Det vert på ein måte meir eksotisk. Eg trur det kan vera interessant for dei som bur i byane å få innblikk i korleis livet er rundt om på bygdene, fortel Garen.

Lang ventetid

Innspelinga av dei 30 episodane, kvar på om lag ti minutt, starta i vår. I midten av august var gjengen ferdig med siste opptaksdag. Medan halvparten av episodane vert publiserte i haust, vert resten sleppte over nyttår.

Dei siste vekene har øystesejenta hatt nedteljing til premieredagen.

– Eg tel minutt og timar. Eg klarar mest ikkje venta. Det er både skummelt og spanande på same tid, seier Garen.

Dei siste månadene har vore svært travle og lærerike. Tidlege morgonar, seine kveldar og mykje venting har vore ein del av kvardagen. Då har det vore godt å ha folk rundt seg som har vorte gode vener både framføre og bak kameraet, forklarar kvemmingen.

Inn og ut av rolla

I innspelingsperioden har ho vorte flinkare til å tora å sleppa seg laus og gå inn i rolla som ein annan person, meiner ho. I tillegg har ho vorte betre til å hugsa manus.

– Kva tenkjer du om å sjå deg sjølv på skjermen?

– Det er litt rart. Eg vert jo ein offentleg person som folk vil danna seg meiningar om, utan å kjenna meg, seier 17-åringen.

Mest spent er Garen på responsen frå sjåarane — om dei vil lika serien, og om dei vil klara å skilja mellom henne som privatperson og som karakteren Thea, som er klassen sin influensar og ei av dei populære. Sjølv om ho kjenner seg att i Thea, er det også mykje som er veldig ulikt, understrekar ho.

– Thea har ein heilt annan bakgrunn og ei anna historie enn meg, og det er fleire av handlingane hennar som eg ikkje støttar. Eg trur at fleire av vala ho tek, vil sjokkera sjåarane, seier Garen.

I serien er det det vestlandske kystmiljøet som er i fokus, og innspelinga har funne stad i Glesvær i Øygarden og i Bergen. Serien vert produsert av Mothership Entertainment AS for NRK.