– Kvar er dette?

– Det hadde vore kjekt å vita kva hus det er i Steinsdalen. Er det eit som eksisterer i dag, eller det vekke for lenge sidan?

Alf Froestad spør. Han fekk nyleg det signerte kunstverket, ei skisse laga med kolstift, i hende, etter at det har vore i slekta lenge. Truleg har det vore nytta som betaling til far hans ein gong i tida.

Bernt Tunold (1877–1946) frå Selja er mest kjend for måleria sine, og står bak ei rekkje verk frå den norske bondekulturen på Vestlandet. Jan H. Landro gav i 2016 ut bok om kunstnaren. Der opplyser han at Tunold oppheldt seg i Kvam i 1933 og 1934, og at han stoppa i Steinsdalen for å måla når han var på veg til eller frå.

«Om koloritten er mørk – grønt og brunt blanda med litt grått og raudt – og skyene trugande, kviler det ei ro over dette grendelaget. Ikkje noko element dreg til seg blikket, alt synest like viktig. Det er nesten som om kunstnaren kjærteiknar omgivnadene», skriv forfattaren. I dalen fann han mellom anna motivet som førte til verket «Gammel gard i Steinsdalen».

Han var ein av dei fremste målarane på 1900-talet, og verka hans heng på langt meir fornemme stader enn i stova til Alf Froestad. Men der, og ingen annan stad, skal biletet frå Steinsdalen fjelga veggen.

Veit du noko om biletet? Ta kontakt med HF.