Kvar deltakar las 1.490 sider i sommar

Det opplyser biblioteksjef i Kvam, Ragna Helene Soldal, i eit straumbrev til HF.

Trass i at elevgrunnlaget gjekk ned frå 725 til 711 elevar, gjekk talet på brukarar frå 288 til 327 i sommar i forhold til i fjor. Det er ein auke på 13,5 prosent.

Oppslutnaden gjekk frå 39,7 prosent til 46 prosent. Det er ny rekord. Den førre rekorden vart sett i 2019, då 43 prosent av alle barneskuleelevar i Kvam hadde registrert seg.

Elevane las til saman 5.355 bøker i år, mot 4.082 i fjor sommar. Det inneber at kvar brukar i år har lese 16,4 bøker, mot 14,2 i fjor, ifylgje biblioteksjefstatistikken.

Det vart i sommar lese 487.383 sider, noko som svarar til 1.490 sider per brukar. I fjor var talet lesne sider for kvar brukar 1.292.

Om ein samanliknar med nabokommunane, las elevane som nyttar Ullensvang bibliotek, 1.667 sider og i snitt 17,6 bøker kvar. Elevane som nyttar Voss bibliotek, las 1.631 sider kvar. I Granvin las dei 1.744 sider kvar, og i Samnanger 1.473 sider.

Sommarles varar frå 1. juni til 31. august kvart år. Alle deltakarane startar på nivå 1 og «stig i gradene» etter kvart som dei registrerer det dei les. Dei får premie på kvart 10. nivå.