Kunstnarar frå heile verda samlast i Øystese: – Her kan eg jobba fritt
Kvifor er ti kunstnarar frå alle verdas kantar innlosjerte i Gamlastovo på Fykse?
Fann alle på samtidig at dei ville sjå Hardangerfjorden?
Nei då, dei er her på invitasjon frå dei lokale kunstnarane Marie Skeie og Motaz Al Habbash.
Sidan 2018 har dei drive programmet «Her og Der», som skal hjelpa nye kunstnarar i Noreg til å etablera seg og bygga nettverk.
– I år ville me gjera noko nytt. Derfor bestemte vi oss for å ha dette opphaldet i Hardanger for kunstnarane, slik at dei kan bli kjende med kvarandre og korleis det er å vera kunstnar i Hardanger, seier Skeie.
Opphaldet er på ti dagar, med «workshops» og utflukter.
Fredag var kunstnarane på plass i Kunsthuset Kabuso for å presentera seg sjølve og arbeidet sitt.
– Det har vore kjempefint. Her har me lært om korleis me kan etablera oss i Noreg og leva av kunsten.
Det seier Rajat Mondal, som kom til Noreg frå India i 2022.
Ved sida av han sit Pei-Han Lin frå Taiwan.
– Det er ingen betre stad der det er lettare å leva av kunsten, enn Noreg, legg ho til.
– I dei fleste andre land, som India, må ein som regel ha fleire jobbar ved sida av for å overleva. Her kan eg jobba fritt og fokusera fullt og heilt på kunsten, seier Mondal.
– Korleis har Hardanger vore?
– Det er i alle fall lett å fokusera på kunsten og jobben, seier Lin med glimt i auget, og kikar ut på dei gråtunge skyene over fjorden.
– Miljø og natur er kjernetema i kunsten min, så det har vore veldig inspirerande for meg å vera her, så tett på naturen, seier Mondal.
