Sparebankstiftinga Hardanger har føreteke den fyrste utdelinga frå koronafondet, skriv dagleg leiar Gunnar Skeie i eit presseskriv. Det er vedteke å fordela til saman 782.711 kroner. Den største tildelinga fekk Fotballklubben Voss med 200.000 kroner. Kunstnarhuset Messen i Ålvik fekk 35.000 kroner for tapa inntekter på grunn av nedstenging, og Harding Puls fekk 30.000 kroner til digitale tiltak.
Frivillige og ideelle lag, foreiningar og organisasjonar med tilhald i Hardanger og Voss kan søkja fondet om vederlag for tapa inntekter eller stønad til digital gjennomføring av lokale arrangement og aktivitetar. Stiftinga tek imot søknader kontinuerleg.
