Kunst som gjer avmakt fysisk

Utstillinga syner kunstverk laga av Rita Marhaug og Terese Longva. Mellom verka til Marhaug er fleire fotografi som syner ein person med kroppen smurd inn i tjukk, svart væske, truleg olje, som sit ved havkanten. Longva stiller mellom anna ut ein serie bilete og ein videofilm som syner ein person kledd i overlevingsdrakt som flyt hjelpelaus i ope hav. Personen har ein spegel der ansiktet skulle vore.

– Kjenner avmakt

Marhaug fortel at dei to kunstnarane har arbeidd med utstillinga i eit par år. Begge har laga kunst om same tema, men arbeidsmåtane er litt ulike.

– Felles for kunsten vår er at me gjennom bilete deler våre tankar om forvaltinga av naturressursane i Noreg. Du kan seia at utstillinga er ei kroppsleggjering av den avmakta mange opplever i møte med dei store systema, seier ho.

For å få fram kva konsekvensar ressursforvaltinga kan ha for lokalsamfunna og naturen, har kunstnarane vitja område med ressurspolitiske konfliktar. Longva har vitja Haramsøy på Sunnmøre, medan Marhaug har vore på Vestvågøy i Lofoten.

Utstillinga inneheld fotografi, videofilmar, trekkspelbøker og eit badekar fylt med olje. Marhaug fortel at dei som vitjar utstillinga den siste helga før den stengjer, kan få oppleva ein liten performance med karet og ho sjølv i hovudrollene.

Film om filosof

Utstillinga er ikkje det einaste dei som vitjar Kabuso, kan oppleva. Så lenge utstillinga er open, vert filmen Vegger som kviskrar vist i konsertsalen. Filmen er laga av Anne Lise Steinseth, og er ein del av prosjektet Av Helene. Prosjektet tek utgangspunkt i livet og livsverket til den austerrikske filosofen og forfattaren Helene von Druskowitz (1856–1918).

Steinseth omtalar filmen som ein poetisk film, spela inn på Kvam bygdemuseum på Storeteigen. Hovudrolla har skodespelar Arnhild Litleré.

Ifølgje avdelingsleiar ved Kunsthuset Kabuso, Sissel Lillebostad, er det ein tematisk samanheng mellom verka i utstillingssalen og filmen.

– Helene von Druskowitz vart etter kvart ein ganske rabiat radikalar og ein uttala kritikar av korleis me forvaltar ressursane. Ho snakka om at me grådig hentar ut rikdom frå jorda, utan å sjå konsekvensane. Ho vart tidleg umyndiggjord, fekk publiseringsforbod og vart lagd inn på ein pleieheim, seier ho.

Både utstillinga og filmen skal visast til 23. april.