Kontinenta møttest i Kvam – Sjå video

Så mange nasjonalitetar var ein del av framsyninga torsdag at prosjektleiar Arngunn Timenes Bell sleit med å ramsa opp alle. Det var vanskeleg å finna eit kontinent som ikkje var representert.Bell fortel at tidlegare arrangerte kulturskulen prosjektet Fleire fargar. Mosaikkfest er arvtakaren, bygd over same leist.

Samla ressurspersonar

Bell fortel at tanken er å kopla saman ressurspersonar frå fleire kulturar som saman arbeider fram ei framsyning. Arbeidet med Fleire fargar har vore gjort på kveldstid. I år valde kulturskulen ein annan vri. Skulen har samarbeidd med barneskulane i Norheimsund og Øystese, Kvam ungdomsskule og Strandebarm skule. Elevane har brukt éin skuletime i veka sidan januar til å førebu framsyninga. Dessutan har dei hatt tre heildagsøvingar like før framsyninga. – Dei første timane brukte me til å leika og tøysa og finna kjekke songar. Så valde me ut det som skulle vera med i framsyninga. Til å byrja med var dette berre for dei som har norsk 2, altså dei som har ekstra norskundervisning fordi dei ikkje har budd så lenge i Noreg. Men så har fleire og fleire som ikkje har norsk 2, teke kontakt og spurt om å få vera med. Me har også spurt songelevane på kulturskulen om dei ville vera med. Gruppa vaks utover våren, fortel ho.

Framsyning med bodskap

Dramapedagog Siv Mælen Strømmen har vore kunstnarleg leiar for framsyninga saman med Ben Milenkovic. Ho fortel at Mosaikkfest har meir dialog og meir skodespel enn Fleire fargar har hatt. Tekstane er henta frå eventyr frå dei ulike kulturane og frå intervju med deltakarane.– Me har rett og slett spurt dei om kva dei hugsa frå då dei kom til Noreg og om korleis møtet med Noreg var. Me hadde lyst til at møte med andre skulle vera tema i framsyninga. Folk har alltid vandra og møtt andre. Gjennom desse reisene har det skjedd ei kulturutveksling. Dette er ikkje noko nytt. Det har skjedd så lenge menneska har budd på jorda, fortel ho.

Mangla pianisten

Mosaikkfest var ein del av programmet til Hardingtonar. Framsyninga vart vist fem gonger – tre gonger torsdag og to gonger fredag.• Les også: – Hardingtonar set Kvam på kartetHF var på kveldsframsyninga torsdag. Då førte stenging av Arnanipatunnelen i Bergen til at musikarane måtte klara seg utan pianisten. Det såg ikkje ut til å leggja ein dempar på dei som stod på scena.– Pianisten er ein meister til å krydra musikken med små melodiar. Sjølv om desse ikkje var der, skjøna aktørane når dei skulle inn og alt fungerte som det skulle. Eg er veldig imponert over at dei klarte seg så bra, seier Bell.Neste år vert det ny fleirkulturell framsyning. Då kjem framsyninga i april.