Kongen og dronninga av country vekte diktargleda

Deltakarane skal senda inn nynorske gjendiktingar av songar av kjende artistar. I år står songar av countrylegendene Dolly Parton og Johnny Cash på programmet.

Ifølgje Brit Aksnes, som er medlem av Littlarm-nemnda, har gjendiktingskonkurransen røter attende til 2012. Sidan den gongen har talet på innkomne bidrag stige jamt og trutt. Til førre Littlarm i 2019 kom det inn 73 bidrag. I år har talet auka til 76.

– Kreative løysingar

Mange av innsendarane har prøvd seg på dei same songane.

– Det vart mange versjonar av «Folsom Prison Blues», «Man in Black», «Jolene» og «9 to 5». Samstundes har andre valt meir ukjende songar. Me fekk inn songar som eg ikkje hadde høyrt. Me som har jobba med dette, har verkeleg vorte kjende med katalogane til Cash og Parton, seier Aksnes.

Aksnes fortel at diktarane har løyst oppgåva på ulike måtar. Medan nokre har gjendikta den engelske teksten ganske direkte, har andre laga morosame og kreative variasjonar av songane.

– Lokal vinnar

Leveringsfristen var 1. juni. Utveljinga byrja med at Aksnes og dei to andre nemndmedlemene, Håvard Gjerde og Svanhild Hjartnes, valde ut dei 13 beste bidraga. Desse vart presenterte for den musikalske juryen, som bestod av musikarane som skal framføra musikken. Heidi Marie Vestrheim er juryleiar.

– 1.-plassen og 2.-plassen vart soleklare, medan tre personar måtte dela 3.-plassen. Det har kome inn bidrag både frå lokale og folk utanfrå. Eg kan seia så mykje som at me i år faktisk har ein lokal vinnar. Så får me håpa vedkomande har høve til å koma på Littlarm, seier Aksnes.

Littlarm vert arrangert i samarbeid med Kvam Mållag og Bygdalarm. Arrangementet går av stabelen 1. juli.