Frå venstre: Hallgeir Aase, Haldis Flotve, Randi Jåstad, Arne Gjerstad og Olav Johannes Skeie er med i festivalnemnda. Åse Ljones og Svein Ove Duesund var ikkje til stades denne dagen. Også fotografen, Kirsten Neverdal, er med i nemnda. Gjerstad og Birgit Jaastad skal snakka om gamle amerikabrev, som han vonar folk har vit til å ta vare på som tidsvitne frå utvandringstida.

Klart for dialekt- og bursdagsfest

Dialekt, identitet og respekt er nøkkelord når den andre utgåva av Dialektfestivalen i Strandebarm vert skipa til komande helg.

Sigbjørn Linga
Bladstyrar
Publisert Sist oppdatert

Kvam Mållag, Fosse-Stiftinga og Folkeakademiet i Kvam har gjeve seg i kast med ein ny festival etter premieren i fjor. Med seg har arrangørane mellom andre biblioteket i Kvam, Strandebarm Ungdomslag, kyrkja og Gamaldansen i Kvam som medhjelparar.

Tre dagar med dialektrelaterte aktivitetar står for døra den siste helga i september. Fredagen kjem sjølvaste biskopen i Bjørgvin, Ragnhild Jepsen, kjem for å opna festivalen i Fossehuset. Det gjer ho til tonane av eit musikalsk program som kyrkja står bak, opplyser festivalnemnda i ei pressemelding.

Litt ymse

Fjorårets registrering av lokale stadnamn vert i år fylgd opp med føredrag om bakgrunnen for lokale stadnamn. Språkføring i amerikabrev, knoting og banning er mellom dei andre emna. Fredag kveld kjem NRK-kjendis og lingvist Gunnstein Akselberg for å kåsera i Haugatun, før gamaldansen vert sleppt laus i storstova.

Sidan førre festival har ein viss forfattar frå bygda like godt vunne ein nobelpris i litteratur. Sundag kjem forfattar og Jon Fosse-biograf Cecilie Seiness, som voks opp i Jondal, for å halda føredrag om nobelprisvinnaren på 65-årsdagen hans – med tilhøyrande kake.

Om festivalen ved fyrste augekast kan verka mest pirrande for dei litt tilårskomne, finst noko også for dei unge. 10.-klassingane i bygda syter for eit språkprogram i form av ein dialektdag for resten av ungdomsskuleelevane fredag. Dei minste borna får vitjing av forfattar Vegard Markhus. Elles står mellom anna yogaleik og eventyrtur på menyen.

I fjor måtte Oddny Miljeteig melda avbod. I år prøver ho igjen å fortelja om korleis det har vore å vera folkevald i bokmålsland.

Identitet og kultur

Bakteppet for festivalen er dialektprosjektet i Strandebarm. Kirsten Neverdal i festivalnemnda trur ifylgje pressemeldinga at festivalen kan framheva språket og kulturen til hardingane. Gjennom arbeid med dialektprosjektet har ho vorte meir medviten om korleis språk og kultur høyrer saman. Sjølv putlar ho med å samla ord og omgrep knytte til strandebarmsbunaden.

Haldis Flotve og Kirsten Neverdal har ansvaret for ein digital basar med det som har vorte særs eksklusive vinstar: bøker signerte av Jon Fosse. – Eg set pris på at ulike lag samarbeider om å skipa til aktivitet i bygda, seier Flotve.

Hallgeir Aase, ein av medlemene i festivalnemnda, meiner at Fosse har hatt mykje å seia for den lokale språkkjensla.

Hallgeir Aase (t.v.) og Olav Johannes Skeie i festivalnemnda. Skeie, over snittet språkinteressert, trur festivalen kan læra folk noko nytt om eigen språkidentitet og bygdekultur.

– Når eg les Fosse, kjenner eg korleis språket hans speglar språktradisjonar i Strandebarm, og det styrkjer identiteten til oss som bur her. Hans tekstar gjev motivasjon til å ta vare på språket vårt, seier Aase.

Randi Jåstad meiner nynorsk og dialekt må kunna nyttast i alle samanhengar i samfunnet. Dei som vel engelsk eller bokmål, er kanskje ikkje medvitne om at valet kan undergrava den lokale identiteten.

strandebarm kultur kultur og underhaldning litteratur fosse-stiftinga
Laga med Labrador CMS