Klare for ny mangfaldsfest
Bygdapride står for døra igjen. Arrangørane vonar at også dei som mislikar arrangementet, bidreg til mangfaldet.
Årets mangfaldsfeirande festival går av stabelen i Øystese 30. mai –2. juni, den same helga som den fyrste helga av Øystese Cup og sykkelrittet Bergen–Voss. Det kan med andre ord verta ei både folksam og fargerik helg i skulebygda.
Ei av eldsjelene bak arrangementet, styreleiar Signe Holst-Larsen i Fargerikt Kvam, opplyser i ei pressemelding at festivalen skal visa fram Kvam som ein open og inkluderande stad å veksa opp.
– Unge skal kjenna at det er plass for alle. Me vil ha slutt på at ungdom flyttar til storbyen på grunn av legning.
Ei rekkje arrangement står på programmet, mellom anna utstilling, konsertar, parade, show med dragartistar og ein debatt i Skummesalen om toleranse og usemje, leia av Beate Gauden. Mellom paneldeltakarane i ordskiftet fredag er BT-kulturrredaktør Jens Kihl, drag queen Jaran Skardal, musikar, artist og sexolog Silje Ballsneeze, kvinneleg inspirert lege og mann Uwe Lübbig og kvemming og ålvikar Jon Egil Fykse. Sistnemnde har levd som delvis open og delvis skjult homofil sidan han var 16.
I fjor dukka ei knall gul campingvogn opp under Bygdapride. Her vart det servert vaflar og kaffi i søkk og kav. Vogna kjem att i år, men denne gongen skal ho stå i Øysteseparken. Vona er å skapa ein open møteplass med god takhøgd der folk med ulike syn kan drøfta. Også dei som meiner at Bygdapride bidreg til fleire kjønnsforvirra born, er velkomne, understrekar arrangørane.
Budsjettet for arrangementet er 150.000 kroner. Mellom andre Kvam herad og Stiftelsen Fritt Ord støttar tilskipinga økonomisk.
