Klare for å overta Myra

Det har vore kjent ei tid at familien er villig til å selja eigedomen til stiftinga.

No er finansieringa i boks, opplyser stiftinga i ei pressemelding. 2,5 millionar kroner er samla inn frå sponsorar. I tillegg kjem ei tilsegn om to millionar kroner frå Sparebankstiftinga Hardanger i haust.

22. januar skal avtalen om overtakinga av barndomsheimen til nobelprisvinnaren signerast. Attåt husa i tunet kjem eit naust og eit sel på Holsete.

Ifylgje stiftinga er det eit krav i skøytet at eigedomen skal vera som han er og «ikkje byggjast ned» av eit nytt Fosse-senter.

– Stiftinga er stolt og audmjuk over at familien har vist tillit til stiftinga på denne måten. Det kviler eit stort ansvar på oss for å nytta eigedomen som ein sentral del av det komande Fosse-senteret. Å vera eigar av barndomsheimen til den verdskjende forfattaren forpliktar, men gjev samstundes stiftinga ny tyngd og energi til hovudprosjektet, skriv stiftinga.

Politikarane Kvam har enno ikkje teke stilling til kvar Fosse-senteret bør liggja. Eit framlegg frå Sp om å peika på den tidlegare skuletomta på Tangerås som rett stad, utan saksutgreiing, vart ikkje realitetshandsama i heradsstyremøtet 12. desember. Saka skal greiast ut til og avgjerast i fyrstkomande heradsstyremøte.

I november vedtok fylkesutvalet samrøystes å stilla seg bak plasseringa på skuletomta, i tråd med ynsket til Fosse-Stiftinga. Det gjorde fylkespolitikarane utan å ta Kvam herad med på råd fyrst. Fleire parti var kritiske og ynske å høyra meininga til Kvam herad fyrst, men stilte seg bak framlegget frå Sp for å sikra brei semje på papiret.