Klappa og klart for festival-jubileum

Hardanger trebåtfestival i Norheimsund følgjer vanleg mal når han brakar laus for alvor laurdag morgon. Mange av båtane kjem tøffande inn sundet fredag kveld. Onsdag var 47 båtar påmelde, dei fleste frå Hordaland, men også til dømes ein frå Stavanger. Allereie for fleire dagar sidan var dei fyrste på plass.– Me er veldig nøgde med påmeldinga. I tillegg har me tretti utstillarar og legg opp til litt meir handverksaktivitetar i teltet enn tidlegare, seier festivalsjef Geir Madsen.Han er imponert over den fliden og innsatsen mange legg ned i puss og stell av flotte båtar før festivalen. Mange «smykke» vert å sjå i båthamna med namnet Botaen, lovar han. Ved ei eiga gjestebryggje får «plastbåtane» liggja. Dei er hjarteleg velkomne, men kan ikkje vera del av utstillinga i båthamna.

Fagleg og folkeleg

I tillegg til fleire litt meir «kommersielle» underhaldningsinnslag byr festivalen på fleire faglege føredrag på Hardanger fartøyvernsenter. – Me prøver å halda ein fagleg profil og ikkje berre ha «fest og basar», seier Madsen.Ungdomar frå Amsterdam-fartøyprosjektet Batavia kjem for å halda dei unge i vigør med diverse aktivitetar. Ungdomane skal dessutan halda føredrag om kopibygging av gamle skip.Veteransjørøvar Olav Bolstad med mannskap, Elias-båten, veteranbilutstilling og diverse prisutdelingar er mellom dei andre trekkplastera. Morten Hesthammer vert tildelt årets ærespris for sin innsats for å dokumentera maritimt handverk og båtbyggjartradisjonar. På Naboen pub vert det kveldsunderhaldning med trubadur Leif Aase både fredag og laurdag.

Treng alltid fleire

Festivalen føreset stor dugnadsinnsats. Madsen legg ikkje skjul på at det er utfordrande å få nok frivillige, men set stor pris på alle som er med.– Det kan vera vanskeleg å få full besetning, så det vert mykje på somme. Me burde kanskje fått til eit generasjonsskifte etter tjue år, seier Madsen.Han legg ikkje opp til ei stor jubileumsmarkering, men held på den same forma som før. Noko av tanken bak splittinga av trebåtfestivalen og Hardingtonar på to helgar i fjor var å utvikla festivalen. Det har ein ikkje lukkast med så mykje som festivalsjefen ynskjer.– Eg er i tvil, så me må vurdera dette igjen, seier han.

Håpar på få dropar

Vêret er viktig for festivalen, men lite å gjera med. Varselet tilseier regn i moderate mengder.– Så lenge det ikkje sipar ned heile dagen, men kjem opphaldsperiodar med solgløtt, er me nøgde. Det kan ikkje verta verre enn opningsåret, då det vel var nedbørsrekord, seier Madsen.Han set stor pris på støtte frå næringslivet, noko som er heilt avgjerande med dagens artistkostnader. Vona han er at det dryp ein del frå festivalen på det lokale næringslivet når så mange samlast i sentrum ei heil helg. Laurdag må ein løysa billett til festivalområdet, medan inngangen er gratis sundag ettersom mange båtgjester reiser heim den dagen. Billetten omfattar også inngang til fartøyvernsenteret.– Kva er høgdepunktet?– Ein godbit er Peter Helland-Hansen si bygging av kyrkjebåt, som han også skal halda føredrag om.