Julehefte frå Kråkevik
«Juleroser 2023» med jondøling Herborg Kråkevik som redaktør kjem ut fredag 3. november, opplyser Samlaget i ei pressemelding.
Årets utgåve er den niande i rekkja.
Juleheftet rommar bidrag frå mellom andre H.M. Dronning Margrethe II av Danmark, Sissel Kyrkjebø og Linn Ullmann. Kvart år inviterer Kråkevik ein musikar til å skriva ein ny julesong. Årets song, «Frosne hjarte», er det Daniel Kvammen som har laga.
Den danske dronninga arbeider med dekorasjonsteknikken decoupage. Ho har illustrert klassikaren «Snedronningen» av H.C. Andersen.
Den raude tråden i årets hefte er snø. I kvart hefte er det trekunsttrykk som ein kan ta ut og ramma inn.
«Juleroser» har ferske bidrag frå nokre av dei fremste forfattarane i vår tid, sett saman med nye og klassiske kunstverk i ein balanse mellom det nostalgiske og det moderne, skriv forlaget. Prosjektet er eit samarbeid mellom Samlaget og Story House Egmont AS.
