Julefilm lokka flest
Den kommunale kinoen selde færre billettar i 2024 enn i 2023. Kinosjef Mary Ann Sørheim håpar at fleire vil finna vegen inn i kinosalen i år.
I 2023 vart 4.456 billettar løyste til filmar hjå Kvam kino. I 2024 minka talet til 3.983. Sørheim fortel at nedgangen var venta. Færre kinobesøk har vore ein nasjonal trend, fortel ho.
Kinosjefen meiner at populære strøymetenester er ein del av årsaka til færre løyste billettar.
– Strøymetenestene har eit stort utval filmar. Det kan medverka til at folk held seg i heimen i staden for å reisa på kino, forklarar Sørheim.
Ho påpeikar at det er noko heilt anna å gå på kino.
– På kino får ein sett dei nyaste filmane. Ein kan koma saman med vener og sjå filmar med god skjerm- og lydkvalitet.
Tek grep
Eit av lyspunkta i 2024 var at fleire kjøpte gåvebillettar enn i 2023.
Sørheim håpar å lokka fleire inn i kinosalen i 2025. Difor har Kvam kino meldt seg inn i Kinoklubben. Om du er medlem av Kinoklubben, får du halv pris på 10 utvalde filmar i året, står det på heimesida til Kvam kino.
Kinosjefen fortel at Kvam kino skal flytta inn i nye lokale mot slutten av året eller neste år. Den nye kinoen skal vera i den nye vidaregåande skulen i Norheimsund. Den nye salen får plass til 156 tilskodarar, som er 26 fleire enn det kinosalen har i dag.
– Det gleder me oss til, fortel Sørheim.
– Barnefilmar er populære
336 publikummar kjøpte billett til den norske filmen «Jul med Astrid Lindgren». Filmen var den mest sette i 2024. Filmen vart vist 6 gonger.
I 2024 arrangerte Kvam kino skuleframsyningar av filmane «Nr.24» og «Tre nøtter til Askepott», fortel Sørheim. «Nr. 24» vart nummer 2 av dei mest sette filmane i 2024.
Sørheim fortel elles at barnefilmar merkjer seg ut som populære.
– Det er kjekt at barnefamiliar går på kino.
På botnen av besøkslista ligg filmen «Dark Windows». Den ville ingen sjå.
