Jula kom til Kinck-garden

– Det har vore fleire utstillarar enn nokon gong og mykje folk som handla. Det var så mykje sal at eit par utstillarar gjekk tidleg fordi dei var tomme for varer. Også julenissen som alltid deler ut snop til borna på julemarknaden, gjekk tidleg tom for godsaker. Mange seier dette er den best besøkte marknaden nokon gong, fortel Anita Eide i Lions Club Strandebarm.

Nytt av året var at klubben hadde ansvaret for julemarknaden åleine. Tidlegare har laget vore medarrangør saman med andre.

Tradisjonen tru var det kafé der gjestene kunne kjøpa mellom anna kaffi og kaker til ein billeg penge. Tidlegare har det gjerne vore hestar på julemarknaden. I år var hestane bytte ut med to tamme sauer. Dei var plasserte i ei inngjerding på marknadsområdet, slik at små og store kunne klappa dei.

Dei 20 utstillarane var plasserte i løa. Julepynt, julebakst og andre julerelaterte produkt dominerte.

Peder Nernæs selde kjøt frå eigen gard og litt gardsprodukt som kom frå andre lokale leverandørar. Ifølgje Nernæs var det første gong kjøt frå garden vart selt på ein marknad.

Dei som ønskte noko godt å drikka, kunne kjøpa drikkevarer frå Breievne Gard, medan dei som hungra etter litteratur, kunne kjøpa det frå Oddvar Skogasel. Dei fleste titlane hadde han skrive sjølv eller vore involvert i på andre måtar.