Journalist på 1990-talet: Post-it-kongen

Namn: Knut Markhus

Tilsett i HF: i ein periode på 1990-talet

– Korleis var det?

– Smått eksotisk. Me jobba i kjellaren i Skaar-huset. Det var ein eigen atmosfære der. Kollegaene mine var trivelege folk. Me framkalla bilete sjølve – det var kjekt! Eg hugsar framleis lukta av kjemikaliar frå mørkerommet.

– Er det ei sak du hugsar ekstra godt?

– Eg skulle dekkja ein konsert med Stephen Ackles på ein pub i Ålvik. Etter konserten vart eg med backstage for å gjera eit kort intervju. Eg hugsar eg tenkte at det verka som ein slitsam og trist livsstil å reisa rundt som pub-musikar.

– Kva saker likte du best?

– Lett og underhaldande kulturstoff var det kjekkaste. Eg brydde meg ikkje så mykje om kva som skjedde på rådhuset.

– Det går rykte om at arbeidsplassen din var ganske full av post-it-lappar. Hadde du ein bestemt arbeidsmetode?

– Post-it-lappar er heilt geniale! Eg hadde nok ein meir impulsiv enn organisert arbeidsmetode.

– Kva gjer du i dag?

– Eg er skribent og arbeider frilans. Gjennom åra har eg skrive for ulike aviser og tidsskrift. I tillegg har eg gjeve ut ein del bøker.

– Kva har HF hatt å seia for karrieren din?

– Jobben i HF var ein av fleire ting eg gjorde for å finna ut av kva eg ville i livet. Han gjorde at eg fekk smaken på skriving. Eg likte kombinasjonen av å snakka med folk og å laga saker. Det driv eg litt med framleis.