Journalist på 1990-talet: Intervjua Fosse
Namn: Hans Magne Ådland
Tilsett i HF: sommarvikar i 1993–1996
– Korleis var det?
– I starten var det litt skummelt å få sakene på trykk. Jobben var utfordrande, men også veldig kjekk. Me framkalla papirbilete i mørkerom på eiga hand. Det var tidkrevjande, men det vart nokre gode resultat.
– Er det ei sak du hugsar ekstra godt?
– Sommaren 1996 skreiv eg eit portrett om Jon Fosse. Då sat me saman og prata i nokre timar. Han hadde jobba i avis sjølv og var veldig hyggeleg. Eg måtte leita fram den artikkelen då Fosse vann nobelprisen.
– Kva saker likte du best?
– Det skjedde ikkje så mykje om sommaren, så ein måtte skriva om det som var. Men eg likte å gjera allmenne saker om til lokalavisstoff. Til dømes EU-kampen i 1994. Det var artig.
– Kva har du gjort sidan?
– Eg arbeidde i Adresseavisa i Trondheim ein periode. Då fekk eg bruk for det eg lærte i HF, både om skriving og foto. Vidare tok eg doktorgrad i fysikk, og i dag jobbar eg i Statkraft.
– Kva har HF hatt å seia for karrieren din?
– Dei somrane var veldig lærerike! Eg utvikla nye sider av meg sjølv. Om eg ikkje jobbar med journalistikk i dag, har eg uansett teke med meg alle erfaringane frå den tida.
