Journalist på 1990-talet: Han stod bak tidenes største skrivefeil

Namn: Sjur Tarjei Fykse

Tilsett i HF: vikar på 1990-talet

– Korleis var det?

– Kjekt, variert og spanande. Eg fekk skriva mykje og hadde trivelege folk rundt meg.

– Er det ei sak du hugsar ekstra godt?

– I 1997 fekk eg tak i eit kart over ei mogleg kraftline mellom Granvin og Samnanger. Dette kom på trykk under tittelen «hemmeleg trasé». Kartet var stempla «begrenset» og skulle ikkje vera offentleg. Då vart det litt styr med kommunen, og me vart ringde frå Direktoratet for samfunnssikkerhet og beredskap.

– Korleis var arbeidskvardagen?

– Det var ein veldig fri arbeidskvardag. Eg hadde mykje å gjera, så det kunne verta lange dagar, men eg likte det godt.

– Kva saker likte du best?

– Politiske saker. Det var artig med tema som skapte litt blest og engasjement! Men eg skreiv om alt mogleg. Eg måtte til og med skriva om fotball.

– Ifølgje dagens redaktør er du forfattar av den mest kjende skrivefeilen i HF si historie, nemleg «Øystese neger og fiskarlag».

– Det stemmer. Det hadde nok vore meir oppstyr om det hadde skjedd i dag – slikt er ikkje lov! Men det er fort gjort. «N» og «J» står jo faretrugande nær kvarandre på tastaturet.

– Kva har du gjort sidan?

Eg har vore lærar i fleire år. I tillegg har eg skrive ein del, mellom anna i Øysteseposten, og eit par bøker. I dag er eg leiar på museumsavdelinga på Hardanger fartøyvernsenter.

– Kva har HF hatt å seia for karrieren din?

– Jobben gav meg veldig god skrivetrening. Eg har alltid likt å leika med ord, nokre gongar til andre sin irritasjon. Det hender eg nyttar ord mange aldri har høyrt før. Då tenkjer eg at dei har moglegheita til å læra noko nytt.