Journalist på 1990-talet: Frå HF til NRK

Namn: Egil Sundvor

Tilsett i HF: sommaren 1991

– Korleis var det?

– Eg visste knapt kva eg gjekk til. Ein skulle finna saker sjølv og måtte vera frampå. Helst skulle eg produsera tre artiklar om dagen.

– Er det ei sak du hugsar ekstra godt?

– Eg fekk skriva om at rådmannen i Jondal vart meld til politiet. Den artikkelen var eg nøgd med. I tillegg fekk eg lov til å trykkja ein fotballartikkel med overskrifta «Kjedeleg, kjedeleg, kjedeleg Norheimsund 0 – Strandebarm 0». Resten av sommaren fekk eg ikkje gå i fred i Norheimsund sine gater.

– Kva type saker likte du?

– Det var stas når rikspolitikarar kom til Kvam. I tillegg likte eg å skriva kritisk om fotball. Me hadde også nokre artige saker som handla om å få fleire jobbar og sterkare næringar i Kvam. Eg fekk prøva meg på mykje forskjellig.

– Gjorde du feil?

– På den tida tok me bilete og framkalla dei sjølve. Ein gong gløymde eg bileta og lét dei liggja for lenge i framkallingsvæska. Mange av bileta til morgondagens avis låg der. Det er nok dei dårlegaste bileta som nokosinne har vorte trykte i HF si historie!

– I helgene måtte me stå opp grytidleg for å henta avisa og levera henne til sjefen. Det hende eg forsov meg. Då vart eg vekt av sjefen på telefonen og fekk verkeleg høyra det.

– Kva jobbar du som i dag?

– Eg er redaktør for dokumentar- og samfunnsavdelinga i NRK. Eg har visst at eg ville verta journalist heilt sidan eg gjekk på ungdomsskulen. Far min var journalist og mor mi jobba i NRK. Det påverka meg nok.

– Korleis er arbeidskvardagen no samanlikna med i HF?

– Heilt annleis. No er eg redaktør og leier produksjonane av artiklar. Grunntanken bak arbeidet, derimot, er lik uansett om mediehuset er stort eller lite. Det er viktig å koma seg ut å snakka med folk og høyra kva dei tenkjer og interesserer seg for.

– Kva har HF hatt å seia for karrieren din?

– Eg har fått stor respekt for lokaljournalistikk. Det er krevjande å vera ein kritisk lokaljournalist. Det var til dømes fleire som vart sinte dersom eg skreiv noko negativt om fotballaget deira.

– Sommarjobben gav meg enormt god mengdetrening i journalistikk. Eg fekk øvd meg i å skriva, formidla og fortelja. Eg lærte om yrket og oppdaga at mykje er opp til ein sjølv. Det var ei fin tid eg ikkje ville vore forutan.