Jonsok i Kvam – sjå biletserie

Marte Bjørgum (5) og Even Tjosås (8) tykte begge at det var stas å gifta seg. Fylgjet treftest i «storesvingen» på Børve i Øystese og enda i hagen hjå brura nede på Børvenes. Der venta god mat og natursti. Brura hadde ynskt seg pavlova til festen. Då mora spurde om ikkje det som allereie var planlagt var godt nok, svara ho at ho skulle trass alt gifta seg.

Bunaden til brura vart spleisa på og sydd seint på 80-talet av ein dugnadsgjeng på Børve. Bunaden er sydd for å passa til ein niåring, så bestemor Karen Marte Bjørgum var nøydd til å sy han inn nokre hakk. Brudgomen sin bunad er kjøpt inn.

— Kva er det kjekkaste med å gifta seg?

— Å få pakkar. Me har fått vassballongar og badebombe. Og kinderegg, seier Marte.

Even hadde allereie skjønt teikninga og nikka einig med, utan innvendingar.

Tiril Gjerde (5) og Oliver Widding Fonneland (5) var årets brurepar på Storeteigen. Brudgomen syntest ikkje noko om det å gifta seg, men brura tykte det var litt moro.

Små og store gjester kosa seg med grilling, stylter, slakk line, badminton, klatring i tre og kubb for å nemna noko. Arne Kristian Glück-Teigland lærte borna å hesja.

Hesten hadde meldt avbod i år, men det fann bestefaren til brura, Jan Arvid Augestad, ei løysing på. Han stilte opp med ein Lincoln Continental Mark V frå 1978 som alternativ.

Sjå bilete frå Øystese, Fykse, Ålvik og Norheimsund under. Sjå bileta frå lesarane her.