Jenterom med særpreg

Kanskje bør 14-åringen på Kysnesstrand vurdera å innføra aldersgrense for å koma inn. Lettskremte kan mista nattesvevnen av langt mindre enn den fargesterke samlinga med «dragon puppets» – på betre norsk drakehovud – som bokstavleg tala gapar mot oss på den gule soveromsveggen.

Dei fleste av verka til «drakejenta» er handdokker, men enkelte kan ein ha på hovudet. Delane er sette saman slik at drakane kan gapa. Over- og underkjeven kan flyttast både éin og to vegar i høve til einannan med ei hand eller ei snor.

Men om resultatet kan vera dyrisk, er det ikkje dyrt. Utgangspunktet er helst jordnært og rimeleg: papp, papir, lim og tusjar.

– Midt i blinken

Hammer har vakse opp på ein romsleg gard på Hammaren med hestehald, den store hobbyen til mamma Marian, som dominerande aktivitet. Men dottera har vore vel så interessert i måling og teikning som i firbeinte. I tillegg har ho hatt ei draging mot drakar, mest av di ho synest dei er majestetiske og elegante i rørslene.

Då ho kom over dragedokkene på TikTok sommaren 2022, var ho seld.

– Både handverk, kunst og drakar! Det var midt i blinken, seier ho.

Etter at ho fyrst vart hekta, gjekk mykje tid med til den nye hobbyen, og dokkene vart etter kvart meir avanserte og forseggjorde. Å laga ei enkel maske kan gjerast på få timar, men dei fleste tek det to til fire dagar å ferdigstilla. Dei mest avanserte kan ta ei heil veke.

– Me ser ikkje alltid så mykje til henne. Ho likar å putla på for seg sjølv, konstaterer mamma Marian.

Etter halvtanna år med drakehovudproduksjon fekk Sara nok og gjekk vidare til neste prosjekt: store dyremasker. I tillegg har ho altså måla, teikna og prøvd seg på skulpturar. Som ho sjølv seier: Ho likar å prøva litt ymse.

Mest autodidakt

Hammer har gått på teikning på kulturskulen i eit års tid, men lengst har ho gått på dramalina. Der trivst ho på tredje året i eit koseleg miljø der elevane lit på kvarandre.

Det meste av handverket har ho lært seg på eiga hand, men med inspirasjon henta frå sosiale medium og diverse nettstader. Særleg TikTok har vorte viktig for henne. Der hadde ho denne veka kring 263.000 fylgjarar på den eine kontoen, som hadde vore nok til å tena litt pengar om ho var over 18 år.

Kunsttalentet finst i slekta; tanta hennar er biletkunstnar Tone Aanderaa. Om også niesa vil satsa som kunstnar, vil tida visa.

Vidare i UKM

10. februar deltok Hammer i ein uoffisiell versjon av Ung kultur møtest (UKM) på Iris Scene i Odda. Ho stilte med fire drakehovud og éi dyremaske.

– Det var folk som syntest det var veldig kult, og eg fekk mange positive tilbakemeldingar. Det var kjekt å visa fram det eg held på med. Eg hadde venta på ein slik sjanse, og om eg ikkje hadde vore med, hadde eg angra på det. Sjølv om det var skummelt, hadde eg lyst til å vera med, seier ho.

– Var det skummelt?

– Litt. Det er jo ikkje nett ein normal hobby. Mange synest nok det er rart, seier Hammer.

Ho ville helst verta nokså dugande før ho viste fram det ho laga til andre, og bortsett frå på TikTok hadde ho ikkje vist fram hobbyane før UKM.

God nok var ho openbert. Debuten enda med at ho vart send vidare til fylkessamlinga på Askøy i april for å representera Ullensvang kommune.

14-åringen har opplevd å få enkelte nedsetjande kommentarar frå dei som tykkjer at det ho driv med, er sært og rart, men ho freistar oversjå slike. Og dei fleste ho får tilbakemeldingar frå, synest at hobbyen hennar er stilig og unik, fortel ho.

Via nettet har Hammer i tillegg fått kontakt med nye vener med liknande interesser, mellom andre ei nederlandsk jente som ho fekk møta personleg då ho vitja tante Tone i Belgia i fjor. Dei møttest i ein park, spela inn videoar og kosa seg i lag, med to av foreldra som vitne. Seinare har veninnene utveksla drakar i posten.