– Jaktar på skodespelarar i Kvam

Alicia Marchong Eidesund i Alicia Casting er i full gang med å sjå etter skodespelarar å fylla ulike roller med i den komande Fosse-filmen. Fredag og laurdag jakta ho etter potensielle skodespelarar i Norheimsund og Strandebarm.

Om lag tjue personar hoppa i det, tok sjansen og prøvde seg i Norheimsund, og nokre færre møtte opp i Fosse-bygda. Pågangen hadde truleg vore større i byen mellom dei sju fjella, men Eidesund ynskte å koma nærare dialekta.

– Me ser etter folk som kan gje autentisitet til filmen, seier ho.

Det er også grunnen til at castingbyrået gjev folk utan erfaring sjansen.

– Men folk er gjerne litt tilbakehaldne? Det ligg kanskje litt i vestlandslynnet. Men det er nett dei som hadde vore perfekte. Det er dei me er ute etter, seier ho.

Om det kriblar litt, er det framleis råd å melda seg på internett.

– Lærte utruleg mykje

Mellom dei som møtte på casting i Norheimsund, var Silje Lunde Husebø. Ho køyrde frå Bergen for å vera med. Til dagleg studerer Husebø matematikk, og skodespelarerfaring har ho lite av. For henne handla det om å koma ut av komfortsona og prøva noko nytt.

Det gjorde det heile ganske skummelt, men det gjekk betre enn venta, fortel ho til HF etter innsatsen. Fyrst og fremst var det veldig moro, synest ho.

– På den vesle tida eg var inne, lærte eg utruleg mykje, seier Husebø.

I byrjinga var ho veldig nervøs, men då ho vart litt varm i trøya og kom inn i det, var det veldig kjekt.

– Må passa saman

Planen er å starta innspeling av filmen til hausten. Ho skal etter planen gjerast på om lag 22 dagar, og dei som er i fullt arbeid eller går på skule, må då søkja seg fri, opplyser Eidesund. Men ikkje alle er med alle dagane, forsikrar ho. I dei mindre rollene er det snakk om eit par dagar.

Alicia Casting har ikkje sett nokon sluttdato for castinga.

– Me leitar til me finn dei rette, seier Eidesund.

– Kva ser du etter?

– Eg ser om dei er med på leiken. På Island heiter det ikkje regissør, men leikeleiar. Det forklarar mykje. Det er det eg er ute etter – folk som er med på leiken, og som gjerne lèt seg leia i leiken, seier ho.

Når folk klarar å by på seg sjølve, vert ho rørt. Det er motiverande, fortel ho.

– Har nokon merkt seg ut?

– Absolutt. Det er mange som skil seg ut og er fine. Men det handlar vel så mykje om samansetninga, seier Eidesund.