Ja, me elskar julefilm!

Heile 544 kvemmingar jazza opp julestemninga med å sjå nyinnspelinga av den tradisjonsrike filmen før jul. Filmen enda som den mest sette filmen i Kvam i 2021.

— Var det venta?

— Ja, det må eg seia. Det er ein film som har fått mykje medieomtale og er ein av filmane me har kunna visa som planlagt. Det er nok ein kombinasjon. Filmen har vore populær både hjå born og vaksne, seier kinosjef i Kvam, Mary Ann Sørheim i Kvam herad.

Kva som vert mest populært i 2022, er vanskeleg å spå om. Det er òg vanskeleg å vita kva som kjem og ikkje, ifylgje kinosjefen.

— Nøgd

2021 har vore prega av periodar med stengde dører eller restriksjonar hjå Kvam kino. Likevel har året gått betre enn venta, fortel Sørheim.

— Alt er digitalisert og me har greie system. Når folk kjøper billett, vert setet ved sidan av automatisk blokkert, til dømes, fortel ho.

I 2021 var det totalt 3.167 besøkjande, fordelte på 106 framsyningar.

— Tala ligg på rundt halvparten av det dei brukar vera. Det er jo ikkje bra, men det er betre enn frykta, seier Sørheim.

Mange endringar

I eit intervju i fjor nemnde kinosjefen at filmproduksjonen var prega av pandemien og at det var vanskeleg å få tak i nye filmar.

— Korleis er stoda no?

— Det er eigentleg akkurat det same. Det er veldig mange avlysingar og utsetjingar. Dei store filmbyråa som me får filmar frå, får ikkje tak i filmar fordi produksjonar vert avlyste og flytta på, fortel Sørheim.

Kvar gong ho får beskjed om at ein film er tilgjengeleg, er det alltid med atterhald om at endringar kan førekoma. Spiderman, til dømes, skulle hatt premiere før jul. Så vart han flytta til 14. januar. Siste beskjed er 28. januar.

Kjem snart

— Kva kan kvemmingane venta seg av filmar framover?

— Det er vanskeleg å seia. Mykje ligg på vent. Mange har nok venta på Spiderman-filmen, til dømes. Og så kjem Kampen om Narvik snart, fortel Sørheim.

Sistnemnde handlar om slaget om Narvik i 1940. Det var det største på norsk jord, og var eit slag der Hitler-Tyskland for fyrste gong gjekk på eit stort tap i andre verdskrig, skriv NRK i ein omtale. Premieren skulle ha vore 1. juledag.

— Eg håpar det kjem fleire tilbod når landet opnar opp att. Me vil jo gjerne tilby film. Så vil me òg at det skal vera ein trygg plass å vera, seier kinosjefen.