Inviterer til nostalgisk musikkreise

Framsyninga skulle eigentleg vera 20. mars 2020, men så skremde koronaviruset styresmaktene til å «stengja ned» Noreg. Dermed vart framsyninga lagd på is. No har koret tina den opp att. Sundag 26. mars vert ho omsider å sjå.

– Dans, teater og musikk

Dirigent Olav Skeie Lid fortel at framsyninga, som har tittelen «A Hard Day’s Night», inneheld langt meir enn berre song.

– Den er ei typisk Olav Skeie Lid-framsyning med både dans, teater og musikk. Me har prøvd å spinna ei historie rundt songane. Handlinga går føre seg på ein jazzkafé som får besøk av Kvammakoret. Kafeen har Beatles-kveld, og det munnar ut i at me syng oss gjennom dei 18 songane me har plukka ut, fortel han.

Lid har sjølv skrive teksten til framsyninga. Han har dessutan ansvaret for koreografi og regi, og har til og med arrangert fleire av songane for kor. «A Hard Day's Night» skal framførast med kostyme, enkle kulissar og nokre rekvisittar.

Koret vert akkompagnert av fire musikarar. Fleire av dei medlemer i bandet The Last Explosion.

– Det har vore ei sann glede å sjå bandet kle seg opp i 70-talsklede. Når dei først får høve til å vera The Beatles, har dei bestemt seg for å ta det heilt ut, fortel Lid.

Mykje nostalgi

Lid fortel at framsyninga er så godt som identisk med den som var premiereklar for tre år sidan.

– Me har fjerna litt fordi den vart for lang, men i all hovudsak vert det som det var planlagt, fortel han.

Kvammakoret har sunge Beatles-songar før, men Lid kjenner ikkje til at koret har sett opp ei heil framsyning med berre musikk frå Liverpool-gruppa.

– Mange av medlemene var unge då The Beatles herja. For dei er framsyninga ei nostalgisk reise i tid. Sjølv om nokre av dei yngre medlemene tykkjer dette er rare tonar, trur eg The Beatles kling godt i mange øyre, seier han.

Lid fortel at det er krevjande å laga ei framsyning med så mange ulike element.

– Det er mange små brikker som skal på plass. Ein kjenner alltid at det vert for lite tid, men me håpar me kjem i mål, seier Lid.

Framsyninga, som berre vert vist éin gong, vert i Øystesehallen. Til gjengjeld vil det vera plass til om lag fire hundre tilhøyrarar.

– Og sjølvsagt håpar me på å fylla hallen, seier Lid.